Կովկասի մահմեդականների վարչության (CMD) նախագահ Ալլահշուքյուր Փաշազադեն քննադատել է Ամենայն Հայոց Կաթողիկոս Գարեգին Երկրորդի հայտարարությունը Արցախի՝ Ադրբեջանին միանալու անընդունելի լինելու մասին։ Փաշազադեն ասել է, որ Ադրբեջանի հետ անհնար է խոսել թշնամանքի լեզվով։ Նրա խոսքով՝ «Հայոց կաթողիկոսը կրոնը շփոթել է քաղաքականության հետ», հաղորդում են ադրբեջանական լրատվամիջոցները։
Նա նշել է, որ Ամենայն Հայոց Կաթողիկոսի հայտարարությունները «հավատացյալին վայել չեն»։ «Կրոնասեր մարդիկ պետք է ծառայեն խաղաղությանը, ոչ թե պատերազմին։ Հայոց կաթողիկոսի պատերազմի նոր կոչերը վկայում են այն մասին, որ նա դարձել է քաղաքական հավակնությունների զոհ»,- ընդգծել է Փաշազադեն։
Ավելի վաղ Գարեգին Բ Ամենայն հայոց կաթողիկոսը, անդրադառնալով վարչապետ Նիկոլ Փաշինյանի այն հայտարարությանը, ըստ որի՝ «Մադրիդյան սկզբունքներով» նախկին իշխանություններն Արցախն Ադրբեջանի կազմում են ճանաչել, հայտարարել է․ «Ամեն կերպ պետք է պաշտպանել Արցախի ժողովրդի ինքնորոշման, անկախ ապրելու աստվածաշնորհ իրավունքը։ Ես չեմ կարող պատկերացնել, որ Արցախը կարող է լինել Ադրբեջանի կազմում, որովհետև դա կնշանակի մի նոր ցեղասպանություն՝ հայ ժողովրդի նկատմամբ, կնշանակի հայաթափում։ Մեր ժողովուրդը չի հաշտվի այդ հանգամանքի հետ»։
Հայաստանի վարչապետ Նիկոլ Փաշինյանը ապրիլի 18-ին հայտարարել էր, որ Հայաստանը լիովին ճանաչում է Ադրբեջանի տարածքային ամբողջականությունը և նույնն ակնկալում է Ադրբեջանից։ Արցախի խորհրդարանն անընդունելի է համարել Փաշինյանի հայտարարությունը՝ Ադրբեջանի տարածքային ամբողջականության ճանաչման վերաբերյալ։ Արցախի Ազգային ժողովի բոլոր հինգ խմբակցություններն ընդգծել են հանրապետության փաստացի կարգավիճակը կասկածի տակ առնող հայտարարությունների անընդունելիությունը։
Փաշինյանն արձագանքել էր Արցախի Ազգային ժողովի խմբակցությունների կողմից Արցախի հարցում իր դիրքորոշման քննադատությանը։ Քաղաքական գործչի խոսքով՝ Արցախում, «որպես կանոն», սխալ են մեկնաբանում իր հայտարարությունները։ Փաշինյանը հորդորել էր սխալներից խուսափելու համար խորանալ հարցերի էության ու բովանդակության մեջ։