Предприятиенең җитештерү куәтләре 2017 елдан бирле консервацияләнгән иде.– «Чакмагыш районында «Стәрлебаш кошчылык фермасы» җәмгыяте базасында кошчылыкны үстерү» проектын төбәк Башлыгы Радий Хәбиров җитәкчелегендә узган «Инвестсәгать» форматындагы инвестицион комитет утырышында карадылар, - диде Хөкүмәт Премьер-министры урынбасары, авыл хуҗалыгы министры Илшат Фазрахманов. - Фикер алышу нәтиҗәләре буенча проект хупланды һәм өстенлекле статуска ия булды. "Инвестсәгать" тә агросәнәгать комплексында барлыгы 168 проект каралган, аларның гомум бәясе 295,5 млрд сум тирәсе.Элек "Чәрмәсән" исемен йөрткән кошчылык фабрикасы хәзер «Стәрлебаш кошчылык фермасы» җәмгыяте филиалы буларак эшли. Кошчылык фабрикасы эшчәнлеген яңадан башлау - Чакмагыш районы һәм төбәк өчен мөһим вакыйга. Елына 780 тонна кош ите (хәләл) җитештерүне ачу тармакта көндәшлекле мохитне үстерүгә генә түгел, ә яңа 65 эш урыны булдыруны тәэмин итәчәк. Инвестиция программасы кысаларында гамәлдәге биналарны реконструкцияләүгә 240 млн сум акча кертү планлаштырыла. Проект 2027 елга кадәр гамәлгә ашырылачак. Бүген инвестор 70 млн сумга якын акча керткән. Бер корпус (5 корпустан) реконструкцияләнә, газ, су, электр белән тәэминаты, җылылык үткәрелә. 30 мең баш кош китерелгән, ел ахырына биредә алар саны 40 меңгә җитәчәк.Инвесторга азык әзерләү өчен 124 гектар җир участогы бирелгән. Предприятиедә техник модернизация бара. Ике трактор, культиватор, сабан, йөк төягеч, ашламалар һәм орлыклар сатып алынган. Тиздән кошчылык фермасы халыкка үсеп җиткән бройлер чебиләрен сата башлаячак. 2023 елда инвестор икенче корпусны реконструкцияләргә һәм файдалануга тапшырырга, чалу цехын ремонтларга планлаштыра.