Башҡортостан Хөкүмәтенең матбуғат хеҙмәте хәбәр итеүенсә, Минскиҙа, XXIX «ТИБО-2023» халыҡ-ара форумы сиктәрендә Минск ҡала башҡарма комитеты рәйесенең беренсе урынбаҫары Надежда Лазаревич Башҡортостандың Күп функциялы үҙәктәре директоры Наталья Куприянова менән осрашты һәм тәжрибә уртаҡлашты. Осрашыу һөҙөмтәләре буйынса Башҡортостандың күп функциялы үҙәк технологияларын Минскиҙың халыҡҡа киң хеҙмәт төрҙәре күрһәтеүсе “Берҙәм тәҙрә” хеҙмәтендә ҡулланыуға әҙерлек белдерелгән. - Был беренсе осрашыу түгел. Диалог һөҙөмтәле үтте. Беҙҙең етәкселәр Минск биләмәһендә үҫтерәһе нөктәләрҙе билдәләне. Был административ процедураларҙы кәметеүгә, уларҙы “Берҙәм тәҙрә” хеҙмәтенә индереүгә бәйле, - ти Надежда Лазаревич. Ул шулай уҡ “Берҙәм тәҙрә” тәжрибәһен Башҡортостанда ҡулланыу ихтималлығын да билдәләй. Наталья Куприянова иһә осрашыуҙың ике яҡтың да партнерлыҡ мөнәсәбәттәрен нығытыу һәм уртаҡ проекттарҙы тормошҡа ашырыу йәһәтенән әһәмиәтле булыуын һыҙыҡ өҫтөнә алды. Башҡортостан ҡунаҡтары Минск ҡалаһының Завод районында эшләгән “Берҙәм тәҙрә” хеҙмәте офисы эшмәкәрлеге менән танышты. Ике яҡ араһында дәүләт хеҙмәттәрен һанлаштырыу, белгестәрҙе дистанциялы уҡытыуҙа һәм технологик яңылыҡтарҙы һынау йәһәтенән хеҙмәттәшлек тураһында килешеүгә ҡул ҡуйылды. Башҡортостандың тышҡы иҡтисади бәйләнештәр һәм конгресс эшмәкәрлеге буйынса министры Маргарита Болычева Башҡортостандың һәм Беларусь Республикаһының күп йүнәлештәр буйынса тығыҙ хеҙмәттәшлеген билдәләне. - 2022 йылда, Халыҡ-ара бизнес аҙналығында Башҡортостандың Күп функциялы үҙәге һәм Беларусь Республикаһының Мәғлүмәти технологиялар үҙәге хеҙмәттәшлек тураһында килешеүгә ҡул ҡуйғайны. Әлеге осрашыуҙар ошоноң сиктәрендә үтә һәм тос һөҙөмтәләр бирә. 26-28 июндә Өфөлә Х Рәсәй һәм Беларусь төбәктәренең форумы уҙа, унда ла был йәһәттән уңыштарыбыҙ менән бүлешә алырбыҙ тип уйлайым, - тип белдерҙе Маргарита Болычева. Шулай уҡ осрашыу сиктәрендә ике республиканың туристик потенциал, һаулыҡ һаҡлау тармағында тәжрибә уртаҡлашыу мөмкинлектәре тикшерелде. Минск ҡала башҡарма комитеты рәйесенең беренсе урынбаҫары Надежда Лазаревич Өфө-Минск тура рейсы ла туристик ағымды арттырыуға, хеҙмәттәшлекте нығытыуға булышлыҡ итә, тип һыҙыҡ өҫтөнә алды. Фото: pravitelstvorb.ru