Бөгөн Башҡортостанда, милләттәштәребеҙ йәшәгән төбәктәрҙә һәм сит илдәрҙә “Башҡорт теленән халыҡ-ара диктиант-2023” акцияһы үтте. Баш ҡалабыҙ Өфөлә диктант яҙыу бер нисә ҙур майҙансыҡта, шулай уҡ Башҡортостан юлдаш телевидениеһы, “Бәйләнештә” социаль селтәре, телеграм-канал аша онлайн алымда яҙыу ойошторолдо. Иң ҙур майҙансыҡтарҙың береһе булған Өфө фән һәм технологиялар университетына 500-ҙән ашыу ошо матур акцияға ҡушылыу өсөн килгән ине. БР Дәүләт Йыйылышы – Ҡоролтай Рәйесе урынбаҫары Рөстәм Ишмөхәмәтов башҡорт телен башланғыс кимәлдә белеүселәргә диктант тексын уҡыны. Ул был сараның әһәмиәте тураһында фекерҙәре менән дә уртаҡлашты. - Минеңсә, әлеге ябай булмаған заманда диктанттың даирәһе генә киңәймәне, ә маҡсаттары, әһәмиәте лә арта бара. Был акция башҡорт телен һаҡлауға булышлыҡ итеү менән бер рәттән халыҡтар араһындағы дуҫлыҡты нығыта, берҙәмлек, бер-береңдең мәҙәниәтенә, йолаларына хөрмәт өлгөһө булып тора. Өфө фән һәм технологиялар университетының мин диктант уҡыған аудиторияһына төрлө йәштәге кешеләр, төрлө һөнәр эйәләре йыйылды. Уҡытыусы хеҙмәтенең мөһимлеге тураһында текст булды. Ул ҙур түгел ине, бөтәһе 150 һүҙ, артыҡ ауыр ҙа булманы. Бөтәһе лә яҡшы яҙғандыр тип ышанам, - тине Рөстәм Ишмөхәмәтов. Фотолар: ӨФТУ сайтынан һәм Р. Ишмөхәмәтовтың социаль селтәрҙәге сәхифәһенән.