Иртәгә, 21 апрелдә Рәсәй мосолмандары изге Ураҙа байрамын билдәләй. Башҡортостанда тантаналы саралар бөтә мәсеттәрҙә лә үтәсәк. Байрам намаҙы өсөн төп майҙан булып Өфөләге “Ләлә-Тюльпан” мәсете һайланған. Мосолман ҡәрҙәштәр ғәйетте тура эфирҙа иртәнге сәғәт 9-ҙан Башҡортостан юлдаш телеканалы аша күҙәтә аласаҡ. Был көндө Башҡортостан юлдаш телевидениеһында “Йома” тапшырыуының 1400-сө сығарылышы күрһәтеләсәк. Хәтерегеҙгә төшөрәбеҙ, был тапшырыу - каналдың бик оҙаҡ барған тапшырыуҙарының береһе, уның беренсе сығарылышы 1991 йылдың 14 ғинуарында сыҡҡан. Шул көндән алып тапшырыу һәр йома һайын тамашасыларҙы мосолмандар мәҙәниәте, йолалары һәм тәғлимәттәре менән танштыра. Тапшырыу геройҙары – Ислам динен тотҡандар, руханиҙар. – “Йома” тапшырыуы – Рәсәйҙәге тәүге ислам тапшырыуҙарының береһе, – тип һөйләй уның авторҙары. – Тәүге алып барыусыһы Шәүрә Ғилманова, Йәркәй Яҡшыдәүләтов ине. Йәркәй Яҡшыдәүләтовкә быйыл 80 йәш тулған булыр ине. Ул билдәле журналист булды, ә Исламды өйрәнә торғас, хаҡ мосолманға әйләнде, хажға барып ҡайтты. Уны эшенә һәм диненә тоғро кеше итеп хәтерләйбеҙ. Телевидениела техник саралар етмәгән саҡта ул үҙенең камераһы менән оператор сифатында сығып, сюжеттар төшөрә ине. Материалдарҙы республиканан ғына түгел, Төркиә, Сәғүд Ғәрәбстаны, Финляндиянан алып ҡайта торғайны. Әлеге ваҡытта “Башҡортостан” телерадиокомпанияһы каналдарында “Йома”, “Иман” һәм “Аль-Фатиха” (рус телендә) тапшырыуҙары сыға. Был проекттарға билдәле журналист Морат Лоҡманов етәкселек итә. 32 йыл сығыу дәүерендә “Йома” бер ҡасан да экрандарҙан киткәне булмаған. Исламдың әхлаҡи ҡиммәттәрен сағылдырыусы программа бер нисә быуын тамашасыны үҫтергән. Яҡын арала БЮТ Башҡортостандың традицион диндәре, православие һәм мосолман лидерҙары тураһында документаль тапшырыуҙар төшөрөргә планлаштыра. “Йома” тапшырыуының проект тарихына арналған махсус сығарылышын 21 апрелдә 10 һәм 18 сәғәттә ҡарарға була. Шулай уҡ был көндө дини эшмәкәрҙәр тураһында документаль фильм, “Аль-Фатиха” тапшырыуының яңы сығарылышы, А. Мөбәрәков исемендәге Сибай дәүләт башҡорт драма театрының Мөжәүир хәҙрәт тураһындағы “Әүлиә” спектаклен ҡарарға була. Фото: vsegda-pomnim.com