“Башҡортостан "Студент стартапы" Бөтә Рәсәй конкурсына ғаризалар һаны буйынса алдынғы өс төбәк иҫәбенә инде. Бөгөн йомғаҡтарҙы Рәсәй Хөкүмәте вице-премьеры Дмитрий Николаевич Чернышенко иғлан итте. Бирелгән 4 мең ғаризаның 203-ө - беҙҙең республиканан. Конкурс еңеүселәре проекттарҙы тормошҡа ашырыу өсөн һәр береһенә 1 миллион һум аҡса аласаҡ Студенттарға уңыштар теләйем!” – тип яҙа үҙенең социаль селтәрҙәрҙәге яҙмаһында Башҡортостан Башлығы Радий Хәбиров. Рәсәй Хөкүмәте сайтындағы мәғлүмәткә ярашлы, "Студент стартапы" конкурсының өсөнсө этабына ғаризалар ҡабул итеү тамамланған. Еңеүселәр исемлеге июндә билдәле буласаҡ. Улар үҙ проектын тормошҡа ашырыу өсөн 1 миллион һум аҡса аласаҡ. Рәсәй Хөкүмәте вице-премьеры Дмитрий Чернышенко "Студент стартапы" конкурсына 4 меңдән ашыу ғариза килгән тип билдәләй, был уҙған йыл менән сағыштырғанда ике тапҡырға күберәк. «Студенттар стартапы конкурсына ихтыяж йылдан-йыл арта бара. Быйыл уға 4 меңдән ашыу ғариза килгән, был элеккегә ҡарағанда ике тапҡырға күберәк. Уларҙың авторҙары — илдең 350-нән ашыу юғары уҡыу йорто студенттары. Конкурс Рәсәйҙең 79 төбәген үҙ эсенә ала, ҡатнашыусылар һаны буйынса Мәскәү, Татарстан һәм Башҡортостан лидерҙар иҫәбендә. Был аңлашыла ла: әлеге төбәктәр фәнни-техник үҫеш рейтингында тәүге бишәү иҫәбенә инә. Ғаризаларҙы ҡарағанда, уларҙың темалары Рәсәй Президенты Владимир Путин билдәләгән ил өсөн мөһим булған тармаҡтарға йүнәлтелгән. Тап ошо стартаптарға айырым иғтибар бүленәсәк. Улар араһында медицина, приборҙар, шулай уҡ импортты алмаштырыуға йүнәлтелгән технологиялар бар», — тип һыҙыҡ өҫтөнә ала Дмитрий Чернышенко. Фотолар Башҡортостан Башлығы Радий Хәбировтың социаль селтәрҙәрҙәге сәхифәһенән алынды.