Бергәләп диктант яҙҙыҡ!

Бөгөн, 20 апрелдә, Башҡортостанда, Рәсәй төбәктәрендә һәм Ер шарының милләттәштәребеҙ йәшәгән төрлө ҡитғаларында “Башҡорт теленән халыҡ-ара диктант-2023” акцияһы үтте. Сара йылдағыса онлайн һәм офлайн форматта уҙғарылды. Диктантты бергәләп яҙыу Өфө фән һәм технологиялар университетында, М. Аҡмулла исемендәге Башҡорт дәүләт педагогия университетында, Башҡортостан Республикаһының Мәғарифты үҫтереү институтында һәм Башҡортостандың Милли музейында ойошторолдо. Шулай уҡ Өфө ваҡыты менән 11.00 сәғәттә Башҡортостан юлдаш телевидениеһында, “Бәйләнештә” социаль селтәрендә, телеграм-каналда дикторҙар диктант тексын тура эфирҙа уҡыны. Йылдағыса башҡорт телен башланғыс кимәлдә белеүселәр, туған телдә иркен аралашыусылар, башҡорт теленең төньяҡ-көнбайыш диалектында һөйләшеүселәр өсөн диктант яҙыу ойошторолдо. Өфө фән һәм технологиялар университетында диктант яҙырға килеүселәрҙе милли кейемдәге ҡыҙҙар һәм егеттәр “Һаумыһығыҙ!” тип ихлас сәләмләп ҡаршы алды. Һәр ерҙә яңғыраған башҡортса сәләмләү һүҙҙәре, ҡурай моңдары сараға тантаналы төҫ өҫтәне. Быйыл университетта башҡорт теленән диктантты төрлө йылдарҙа ошо уҡыу йортон тамамлаған, әлеге мәлдә милләтебеҙҙе мәҙәниәттә, сәйәсәттә, мәғарифта лайыҡлы танытҡан шәхестәр уҡыны. Улар – Башҡортостандың халыҡ артисы, данлыҡлы бейеүсе Риф Ғәбитов, БР Дәүләт Йыйылышы – Ҡоролтай рәйесе урынбаҫары Рөстәм Ишмөхәмәтов һәм “Башҡорт теле һәм әҙәбиәте йыл уҡытыусыһы-2021” төбәк-ара конкурсы лауреаты, Илеш районы Ишҡар урта мәктәбе уҡытыусыһы Гүзәл Саҙретдинова. - Һеҙҙең барығыҙҙы ла Өфө фән һәм технологиялар университетында күреүебеҙгә шатбыҙ. 2015 йылда башланып киткән матур сараға тап ошонда – ул ваҡыттағы Башҡорт дәүләт университетында нигеҙ һалынғайны. 2019 йылдан Башҡорт теленән диктант халыҡ-ара статусҡа эйә булды һәм быйыл туғыҙынсы тапҡыр ойошторола, - тип һөйләне Өфө фән һәм технологиялар университетының башҡорт филологияһы, шәрҡиәт һәм журналистика факультеты деканы Гөлфирә Риф ҡыҙы Абдуллина. Артабан Башҡортостандың халыҡ артисы Азамат Тимеров һәм Башҡортостандың атҡаҙанған артисы, ҡурайсы Илнур Хәйруллин башҡарыуында халҡыбыҙҙың гимны – “Урал” йыры яңғыраны. Ойоштороусылар Башҡорт теленән диктант яҙыу акцияһында йыл һайын әүҙем ҡатнашыусыларға, әһәмиәтле сараны үткәреүгә булышлыҡ итеүселәргә иҫтәлекле бүләктәр тапшырҙы. Шулай уҡ бөгөн теләге булған һәр кем диктантты өйҙә үҙаллы яҙҙы. Диктант яҙылған ҡағыҙҙы фотоға төшөрөп, электрон почтаға Bashdiktant2023@mail.ru йәки телеграмма-ботҡа https://t.me/bash_dictant_bot 23 апрелдә 23:59 сәғәткә тиклем ебәрергә кәрәк. Айрат Нурмөхәмәтов фотолары.