Тәрбиә иғтибар үҙәгендә

19 апрелдә республика мәктәптәре директорҙарының тәрбиә эштәре буйынса урынбаҫарҙары өсөн төбәк семинар–кәңәшмәһе үткәрелде. Ул илһөйәрлек тәрбиәһенең һөҙөмтәле системаһын булдырыу һәм мәктәп мөхитендә деструктив тәртипте профилактикалау мәсьәләләренә арналды. Семинар Башҡортостан Юғары уҡыу йорттары ректорҙары советы һәм уның рәйесе, М. Аҡмулла исемендәге Башҡорт дәүләт педагогия университеты ректоры Салауат Сәғитов башланғысы буйынса уҙғарылды. Ошо уҡыу йортоноң Терроризм һәм экстремизм идеологияһына ҡаршы тороу буйынса координация советы сараның ойоштороусыһы булды. Семинар Зубов ауылында “Белем” белем биреү үҙәгендә үтте. Өфө, Архангел, Шишмә, Ауырғазы райондарының дөйөм белем биреү мәктәптәре, гимназия, лицейҙары директорҙарының тәрбиә эштәре буйынса 100-ҙән ашыу урынбаҫарҙары ҡатнашты. Семинар-кәңәшмәнең темаһы көнүҙәк. Педагогтарға, директор урынбаҫарҙарына мәктәптәрҙә илһөйәрлек тәрбиәһен ойоштороу йүнәлешендә эште нығытыу, шулай уҡ мәктәптә деструктив тәртиптең сәбәптәрен асыҡлау мөһим. БДПУ ректоры исеменән Юғары уҡыу йортоноң терроризм һәм экстремизм идеологияһына ҡаршы тороу буйынса координация үҙәге директоры Илһам Хәбибуллин тәбрикләү һүҙе менән сығыш яһаны. “Университеттың координация үҙәге алдында етди бурыстар ҡуйылған, улар бөгөн уңышлы хәл ителә. Тәрбиәүи сара – тәүге сираттағы бурыс. Башҡорт дәүләт педагогия университетында анализ яһап, илһөйәрлек тәрбиәһе менән бәйле бер нисә проблема асыҡланыҡ. Был проблемалар дөйөм белем биреү учреждениеларында ла осрай,” –тине Илһам Ғәли улы. Ҡатнашыусыларҙы шулай уҡ Өфө районы хакимиәте башлығы урынбаҫары Люцина Ризуанова тәбрикләне. Башҡортостандың бала хоҡуҡтары буйынса тулы хоҡуҡлы вәкиле Ольга Панчихина үҙенең сығышында иғтибарҙы ата-әсәләр менән эшләүгә йүнәлтергә саҡырҙы. Фото:bspu.ru