Силәбе өлкәһе буйынса Рәсәй Ғәҙәттән тыш хәлдәр министрлығының Үҙәк контроль үҙәге мәғлүмәте буйынса, Силәбе өлкәһенең Үрге Урал районындағы Учалы тау-байыҡтырыу заводының Үҙйылға шахтаһында 520 метр тәрәнлектә фронталь йөк ташыусы янып киткән. Һәләк булыусылар һәм зыян күреүселәр юҡ. - Янғын башланған мәлдә шахтала барлығы 347 кеше була, ер өҫтөнә үҙаллы 346 кеше эвакуациялана. Йөк тейәүсе янып киткән төпкөлдә эшсе тороп ҡала. Бәхеткә күрә, ул зыян күрмәй. Ҡотҡарыусылар уны өҫкә күтәрә. Медицина ярҙамы талап ителмәй. Учалы тау-байыҡтырыу заводы диспетчеры хәбәр итеүенсә, 20-00-гә ҡарата тораҡ пункттарға хәүеф янамай. Учалы ҡалаһына тиклем ара — 25 километр тәшкил итә. Әлеге ваҡытта янғын һүндерелгән, - тип хәбәр итә Башҡортостандың Ғәҙәттән тыш хәлдәр буйынса Дәүләт комитеты белгесе Зайтүнгөл Собханғолова. Фото Башҡортостандың Ғәҙәттән тыш хәлдәр буйынса Дәүләт комитетынан алынды.