ЮНЕСКО (UNESCO — United Nations Educational, Scientific and Cultural Organization) — Мәгариф, фән һәм мәдәният сораулары буенча Берләшкән Милләтләр Оешмасы.
ЮНЕСКОның төп бурычы — халыкларның фән, мәгариф, мәдәният, мәгълүмат өлкәләрендәге хезмәттәшлеген киңәйтеп, тынычлык һәм хәвефсезлекне ныгытуга булышлык итү.
Петербург 1990 нчы елда ЮНЕСКО исемлегендәге Россиянең беренче объекты була. Бу объект турында ЮНЕСКО сайтында "Санкт-Петербургның тарихи үзәгенең төп үзенчәлеге - архитектура һәм су пейзажларының камил гармониясе", - дип әйтелә.
Бу мәкаләдә сез Санкт-Петербургның ЮНЕСКО мәдәни мирасы исемлегенә кертелгән истәлекле урыннары турында укый аласыз:
1. Адмиралтейство
Адмиралтейство – ул Петр чорында Россия империясенең суднолар төзү урыны. Биналарның күпчелеге кораблар җитештерү өчен остаханәләр булган. Хәзер монда илнең Хәрби-диңгез флотының баш командованиесе урнашкан.
2. Петр һәм Павел ныгытмасы
Петропавел ныгытмасы - Санкт-Петербургның иң борынгы хәрби-инженерлык корылмаларының берсе булып тора. Аны төзүдән, асылда, шәһәрнең барлыкка килүе башлана.
3. Кышкы сарай
Кышкы Сарай (1918-1943 елларда — Сәнгать Сарае) — Россиянең баш император сарае. Совет чорыннан башлап сарайда Дәүләт Эрмитажының төп экспозициясе урнаштырылган.
4. Сарай мәйданы
Сарай мәйданы (1918 елдан 1944 елга кадәр Урицкий мәйданы) — XVIII гасырның икенче яртысында — XIX гасырның беренче яртысында барлыкка килгән архитектура ансамбле, Санкт-Петербургның төп мәйданы.
5. Исаакий соборы
Петербургның төп гыйбадәтханәсе булып 19 гасырда француз архитекторы Монферран тарафыннан төзелгән Исаакий соборы тора. Аның гөмбәзе шәһәрнең барлык түбәләреннән диярлек күренә. Собор дөньяда иң зурларның берсе булып тора, 14 мең кешене сыйдыра.
6. Бакыр җайдак
Бакыр җайдак - Россия императоры Петр беренчегә багышланган монументаль һәйкәл. Санкт-Петербургның бер символы булып тора.
7. Зур Петергоф Сарае
Зур Петергоф сарае – “Петергоф” парк-ансамбленең төп бинасы. Икенче бөтендөнья сугышы вакытында тулысынча диярлек җимерелгән, 1952 елда торгызылган.
8. Царское село
Царское Село - Пушкин шәһәрендәге музей-тыюлык, үз эченә XVIII-XIX гасырларның сарай-парк ансамблен һәм элеккеге шәһәр читендәге патша резиденциясе ала. Музей-тыюлык исеме 1992 елда бирелә.
9. Казан соборы
Казан соборы - Нева проспектының чын бизәге. Ярты гасыр диярлек Петербургның иң зур гыйбадәтханәсе булып тора. Ул Петербургта 1811 елда төзелгән.
10. Нева елгасы һәм ярлары
Нева елгасы Ленинград өлкәсе һәм Санкт-Петербург территориясе буйлап ага. Ладога күлен Фин култыгының Нева тамагы белән тоташтыра.