Белем усағының йәш быуынды йәлеп итә алыу сере ниҙә?

Бәләбәйҙә бик матур итеп башҡорт гимназияһы эшләүе тураһында электән ишетеп белһәм дә, бығаса барып күрергә юл төшмәне. Бөгөн эш сәфәре менән Бәләбәй яҡтарына юлланғанда төп маҡсаттарыбыҙҙың береһе ошо уҡыу йорто менән дә танышыу ине. Дилбәр Фәтхетдинова етәкселек иткән гимназияла 900-ҙән ашыу уҡыусы белем ала. Башҡорт гимназияһының ғорурланып һөйләрлек ҡаҙаныштары аҙ түгел. Гимназистар араһында мәктәп уҡыусыларының Бөтә Рәсәй олимпиадаларының йомғаҡлау этабында еңеүҙәр яулауы, төрлө кимәлдәге конкурстарҙа алдынғы урындар биләүе, үҙҙәренең телестудияһы эшләүе, гәзит сығарыуҙары, һәр яҡлап өлгөлө булған уҡыусыларҙан Шайморатовсылар класы ойошторолоуы, гимназияның, ошо төбәктең тарихын сағылдырған музей булдырылыуы, ҡыштан уҡ үрсетмәләр үҫтереп, мәктәп алды участкаһынан матур уңыш йыйыуҙары, уны үҙҙәренә генә ҡулланып ҡалмай, йәрминкәләрҙә һатыуҙары һәм башҡа бик күп уңыштары аша был уҡыу йортонда тормоштоң ҡайнап тороуын күрҙек. Иң ҙур баһа – әлбиттә, уҡыусыларҙың гимназияны яратыуҙары, уға атлығып тороуҙары. Төрлө милләт балаларын туплаған белем усағының йәш быуынды йәлеп итә алыу сере ниҙә? Был турала гәзит биттәрендә мәҡәләлә уҡып белерһегеҙ. Фотоһүрәттәрҙә һәм видеояҙмала гимназия тормошоноң бер өлөшө сағыла. Әйткәндәй, сығарылыш класс уҡыусыларының “Һуңғы ҡыңғырау“ байрамына әҙерлек мәленә тап килеп был күренеште лә төшөрөп алдыҡ. Автор фотолары һәм видеоһы.