Урамда көслө ямғыр аҫтында ҡалғанда һәр кем йәшенер урын эҙләй башлай, өҫтәүенә көслө ел әҙәм балаһын торлағына ҡыуалай. Тик бына барыһы ла ошондай ваҡытта ҡайтырға ашҡынамы икән?... Бына Фәйрүзә фатирына ҡайтырға бер ҙә ҡабаланмай. Ошондай ваҡытта йыш ҡына ул “Кем мин, ниңә бәхетһеҙмен?” тигән һорауға тағы ла яуап эҙләргә тотона. Эйе, был яҡты донъяға әсәй, ҡатын булыу өсөн килгән. Тәбиғәттең бына ошолай көйәләнгән мәлдәрендә өйөңдә үҙеңде көтөр, уға һыйыныр, йылыныр кешең булыуы кәрәк тә бит. Тик... Фатирында элек бала тауышы тынмай, бәлеш еҫтәре танауҙы ҡытыҡлай ине. Ҡурсаҡтай сибәр ҡыҙы, яратҡан ире – барыһы ла булды тулы бәхет өсөн. Тик бер көн бар тормошон пыран-зыран килтерҙе Фәйрүзәнең. Бер ҡасан да төҙәтә алмаҫлыҡ хәл булды. Биш йәшлек ҡыҙсығын “Ашығыс ярҙам” дауаханаға алып китте лә, бәләкәсе кире әйләнеп ҡайтманы. Ниңә тап уның балаһы юл-транспорт фажиғәһенә тарыны, ниңә ғүмере өҙөлдө?.. Ул көндә бергәләшеп паркка барғайнылар. Ҡыҙҙы атаһы етәкләп алған ине. Тик бер заман бала ҡулдан ысҡынды ла йүгереп китте... Ҡалғанын йүнләп иҫләмәй ҡатын. Аҙаҡ ирен иғтибарһыҙлыҡта ғәйепләне лә ғәйепләне. Ул да оҙаҡламай ҡатындың тормошонан юғалды: шым ғына әйберҙәрен йыйып сығып китте фатирҙан... Ошо йортҡа хәҙер нисек ҡайтҡың килһен? Ә ямғыр күҙ йәштәрен йыуып төшөрә, күрһәтмәй. Фәйрүзә менән бергә илай. Тик ямғыр бер мәл туҡтай шул. Ә бына йөрәктең һыҙлауын нисек туҡтатырға? Артабан нисек йәшәргә?.. Фото: alev.biz.