Хәтерләүдән курыкмыйк, ата-бабаларыбызның яшәү рәвешен, кәсепләренең һәр тормыш шартына яраклылыгын онытмыйк!Бу кәсепләрне, һөнәрләрне үстерү, яңарту һәм саклау – көнүзәк бурыч. Әнә шул изге максатка корылды 28 апрель көнне Борай районында үткән "Сарыкчылык – бәрәкәт, бәрәкәттә – хәрәкәт" дип аталган зур чара. Аны район хакимияте, Хатын-кызлар советы, "Сәхибҗамал" татар хатын-кызлар оешмасы, Башкортстан татарлары конгрессының Борай бүлекчәсе һәм "Борай фермеры" җәмгыяте башка кайбер җәмәгать оешмаларын да җәлеп итеп үткәрүгә иреште.Чарада республикадан килгән абруйлы кунаклар, атап әйткәндә, республика Хатын–кызлар берлегенең алыштыргысыз лидеры Р. Солтанова, Бөтендөнья татар конгрессының Башкортстандагы вәкиле Ә. Дәүләтшин, "Сәхибҗамал" республика татар хатын-кызлар статусын күтәрү оешмасы җитәкчесе Ф. Нәдергулова, Башкортстан татарлары милли- мәдәни автономиясенең башкарма директоры А. Хәлиуллина һәм башка дәрәҗәле шәхесләрнең, шул исәптән район хакимияте башлыгының социаль мәсьәләләр буенча урынбасары Г. Нуртдинов, район авыл хуҗалыгы идарәсе зоотехнигы Л.Багоув, "Борай фермеры" бренды белән танылган эшкуар Ә. Зариповның, чараның әһәмиятен югары бәяләп, бу проектны дәвам итәргә кирәклеген билгеләп чыгышлар ясавы, активларга Мактау һәм Рәхмәт хатлары, бүләкләр өләшүе аның мөһимлеген раслады.Бу көнне Мдәният сараенда халык кәсепләренә багышланган зур күргәзмә эшләде, кунаклар һәм килгән тамашачылар, бигрәк тә укучы яшьләр аны кызыксынып карады. Алынган темага ярашлы әзерләнгән "Авылымның айлы кичләре" милли мәдәни-музыкаль фольклор күренеше , сарык асрау темасына үткәрелгән фотоконкурс, шигъри бәйгеләр, бу җәһәттән "Борай фермеры" тараткан матур бүләкләр дә беркемне дә битараф калдырмады, ә чараны тирәнрәк аңларга, аның халыкчан рухиятен ачарга ярдәм итте.Халык һәм кунаклар тамашадан канәгать һәм оештыручыларга рәхмәтле булып таралышты.Автор: Зәлия Ахунова.