Шишмә районында ҡулланылған батарейкалар йыйыу буйынса “Планетаны бергәләп һаҡлайыҡ!” акцияһы үтте. Акцияла 18 белем биреү учреждениеһынан ике меңгә яҡын кеше ҡатнашты. Ирекмәндәр бөтәһе 240 килограмдан ашыу батарейка йыйҙы. Өфө эргәһе территориаль идаралығы начальнигы урынбаҫары Рөстәм Мифтахов һүҙҙәренсә, ташланған бер батарейка ғына 20 квадрат метр тупраҡты йәки 400 литр һыуҙы ауыр металдар менән бысрата. Был металдар тупраҡ аша беҙҙең аҙыҡҡа ла эләгә. Ташланған батарейкаларҙан ҙур зыян күләмен күҙ алдына килтерәһегеҙме? Заводтағы батарейкаларҙы эшкәртеп, ҡиммәтле ресурстар алырға мөмкин, улар сәнәғәттең төрлө тармаҡтарында яңы материалдар етештереүгә йүнәлтелә. Шулай уҡ акция сиктәрендә Шишмә районында пластик ҡапҡастар йыйыу ойошторолған. Күмәк көс менән 100 килограмдан ашыу пластик ҡапҡас йыйылған. Бындай сараларҙы үткәреү ил Президенты Владимир Путиндың май указдары менән булдырылған “Экология” милли проекты маҡсаттарына һәм бурыстарына тулыһынса тап килә. Граждандарҙың экологик мәҙәниәтен һәм яуаплылығын арттырыу уның төп йүнәлештәренең береһе булып тора. – Тәбиғәт беҙгә күпме ғәжәйеп, сағыу буяуҙар бүләк итә. Һәм был мәҙәни һәм тәбиғи мираҫты дөйөм тырышлығыбыҙ менән генә һаҡлап ҡалырға мөмкин, – тип йомғаҡланы Рөстәм Мифтахов. Фото: Тәбиғәттән файҙаланыу һәм экология министрлығы.