Яҙ һәм хеҙмәт байрамы айҡанлы юғары наградалар алыусылар араһында ил инәһе Мәрйәм апай Бураҡаева ла бар. Ул бөгөн Башҡортостан Башлығы Радий Хәбиров ҡулынан “Хеҙмәт ҡаһарманлығы өсөн” миҙалын алды! Награда алғандан һуң Мәрйәм апай беҙҙең менән тәьҫораттары менән уртаҡлашты. – Бүләк барлыҡ 80 йәшлек ғүмеремә тиклем күрһәткән хеҙмәттәрем өсөн баһа тип уйлайым. Журналист та, уҡытыусы булараҡ та байтаҡ ҡына эштәр башҡара алдым һәм шуға ҡыуанам, халҡыма хеҙмәт итәм. Мөмкин тиклем артабан да хеҙмәт итеүҙе дауам итермен тип уйлайым. Проекттар бар, уларҙы дауам итәм, – тине ул. Башҡортостанда Мәрйәм апайҙы белмәгән кеше, мәктәп уҡыусыһы бармы икән? Беҙ барыбыҙ ҙа уның китаптары аша республикабыҙҙың мәҙәниәтен өйрәнгәнбеҙ. Педагог, яҙыусы, әүҙем йәмәғәт эшмәкәре Мәрйәм Сабирйән ҡыҙы Бураҡаева күптән түгел оло юбилейын – 80 йәшен билдәләне. Халҡыбыҙ араһында уның абруйы, дәрәжәһе бик юғары, Мәрйәм апай башланғысы менән мәктәптә балалар “Тормош һабаҡтары” дәресен уҡыны, башҡорт балаларына милли тәрбиә нигеҙҙәрен, милли рух һалған “Йәйләү” йәйге ял итеү үҙәге эшләй башланы һәм, уңышлы дауам итә. Республикабыҙҙа ҙур дәрт менән ҡабул ителеп, дәррәү күтәреп алынған “Шәжәрә байрамы”, “Башҡортостан ынйылары”, “Урал батыр мәктәбе”, “Өләсәйҙәр мәктәбе” проекттарының авторы ла – Мәрйәм Сабирйән ҡыҙы. Уның үҫеп килгән быуынға әхлаҡи, рухи тәрбиә биреүгә, илһөйәрлек тойғоһо, тәбиғәткә һаҡсыл ҡараш һалыуға арналған, халыҡ педагогикаһына таянып яҙылған хеҙмәттәре көслө ҡыҙыҡһыныу уятты һәм уята, ҙур ихтыяж менән файҙалана. Затлы шәхесебеҙҙең һәр мәсьәләгә үҙ фекере, ҡарашы бар. Һәр әйткәне – алтынға бәрәбәр аҡыл, тәжрибә үрнәге. Мәрйәм апай рәхмәт һәм ҡотлау һүҙҙәрен еткерҙе. – Бар республика халҡын байрам менән ҡотлайым, үҙ телемдә ҡотлай алғаным өсөн бәхетлемен. Хеҙмәтемде баһалаған республика етәкселегенә, һәр проектымды, башланғысымды хуплап, күтәреп алған халҡыбыҙ вәкилдәренә рәхмәтлемен. Проекттар күп, улар өҫтөндә эш туҡтамай. Әле “Урал батыр мәктәбе” проекты әүҙем эшләй. Уның буйынса һәр башҡорт мәктәбендә, гимназияһында эшләйбеҙ. Ошо арала Күмертау гимназияһында Исҡужин уҡыуҙары үтте, Красноусолда эшләнек, Йылайырҙа ойошторорға йыйынабыҙ. Ҡыҫҡаһы, пландар күп, уларҙы тормошҡа ашырырға яҙһын, – тине ул. Ил инәһен матур наградаһы менән ҡотлайбыҙ. Республикабыҙ мәнфәғәтендә артабан да хеҙмәт итерлек көс һәм һаулыҡ теләйбеҙ уға. Миңзифа Илтенбаева фотолары.