Һигеҙ мең урынлы залда алма төшөрлөк тә урын юҡ ине

Кисә Өфө-Арена спорт һарайы гөрләп торҙо, тик унда хоккей көйәрмәндәре түгел, ә Башҡортостандың халыҡ йырсыһы Вилдан Яруллиндың ижадын үҙ итеүселәр йыйылды. Күренекле йырсы, легендар «Каруанһарай» төркөмө солисы Вилдан Хәлидар улы үҙенең күркәм юбилейын - 55 йәшен билдәләне. Тамаша ғәҙәти булмаған форматта, грандиоз әҙерләнгәйне, һигеҙ меңлек залда алма төшөрлөк тә урын юҡ ине. Сағыу сара «Каруанһарай» төркөмө элекке составында популяр, илһөйәрлек хисе менән һуғарылған йырҙары менән үрелеп барҙы, тамашасы юбиляр башҡарыуында моңло йырҙарҙы тыңлап хисләнде. Шулай уҡ юбилярҙы ҡотларға тип илебеҙҙең һәм унан ситтән дә бик күп дуҫтары йыйылды. Иң мәртәбәле ҡунаҡ «Ялла» төркөмөнөң солисы - Үзбәкстандың халыҡ артисы Фарух Закиров ине, оло йәштә булыуына ҡарамаҫтан, егеттәрсә етеҙ йырсы «Өс ҡоҙоҡ» йырын башҡарҙы. Әйткәндәй уға бөгөн 77 йәш тулды. ТР һәм БР-ҙың халыҡ артисы Салауат Фәтхетдинов, популяр йырсы Гүзәл Уразова, Илсөйә Бәҙретдинова, Зинира һәм Ризат Рамазановтар кеүек Татарстандың сағыу йондоҙҙары килгәйне дуҫтарын ҡотларға. Республикабыҙҙың атҡаҙанған йырсыһы Марсель Ҡотоев моңло тауышы менән күңелде арбаны. Зәйнетдин, Нәжип Юлдашбаев, Стәрлетамаҡ бейеү театры, «Гүзәлданс» ҡыҙҙарының бейеүе тамашаны тағы ла йәнләндереп ебәрҙе. Вилдан Яруллинды тәбрикләргә тип шулай уҡ Төньяҡ Осетияның халыҡ йырсыһы Феликс Царикате ла килеп еткәйне, үҙенең киң диапазонлы тауышы менән күңелдәрҙе әсир итте ул. Ә инде программаның кульминацияһы булып Мәскәү ҡунағы, легендар төркөм «Земляне» торҙо. Космонавт костюмында сыҡҡан Вилдан Яруллин менән бергәләп билдәле хитты башҡарҙы улар. Шулай итеп, дүрт сәғәттән ашыу барған йыр-моңға бай тамаша бер тынала үтеп китте. Вилдан Яруллинды күркәм юбилейы менән ҡайнар ҡотлайбыҙ, иң изге теләктәребеҙҙе юллайбыҙ!