Республикабыҙҙың Салауат Юлаев исемендәге батальоны яугирҙәренә үткән айҙа гуманитар ярҙам ебәргәндә "Башҡортостан" гәзитенең байтаҡ һандарын да һалғайныҡ. Белеүебеҙсә, унда башҡорт егеттәре күп, шулай уҡ туғандаш халыҡтарыбыҙ ҙа телебеҙҙе аңлай. - "Башҡортостан" гәзите беҙҙе иң ауыр мәлдәребеҙҙең береһендә - бәйләнеш бөтөнләй булмаған, яҡындарыбыҙ менән әллә нисә көн хәбәрләшә алмай йонсоған ваҡытта килеп тапты. Һыуға сарсағандай, уға күмәкләп йәбештек, төрлө һандарын ҡулдан-ҡулға йөрөтөп уҡып сыҡтыҡ. Күңелебеҙгә әйтеп аңлата алмаҫлыҡ көс бирҙе, дауа булды "Башҡортостан"ыбыҙ. Республикабыҙҙың тормошо, яҡташтарыбыҙҙың хәле, ҙур тырышлыҡ менән матур, имен, татыу йәшәргә ынтылышы хаҡында уҡып, шул ҡәҙәр һөйөндөк. Махсус хәрби операциялағыларға дәррәү ярҙам күрһәтелеүе, төрлө кәрәк-яраҡтарҙы ихлас эшләүҙәре тураһындағы яҙмаларҙан хатта күҙҙәребеҙгә йәш төйөлдө. Ҙур рәхмәт һеҙгә, ҡәҙерле яҡташтарыбыҙ! Һеҙҙең ярҙамығыҙ, даими хәстәрлегегеҙ ауыр хеҙмәтте еңеләйтеп ебәргәндәй. "Башҡортостан" гәзите редакцияһына Башҡортостаныбыҙ халҡының тормош һулышын тойҙорғаны, беҙгә рух, көс өҫтәп ебәргәне өсөн ҙур рәхмәт! Тыуған ерҙән ситтә милли баҫмаларҙың, туған телдең ҡәҙере, тәме айырыуса ныҡ тойола. Алла бирһә, тыуған яғыбыҙға имен-аман әйләнеп ҡайтырбыҙ, гәзит-журналдарыбыҙҙы күмәкләп алдырып уҡырбыҙ" тип һөйләшеп ҡуйҙыҡ, - тип йылы сәләм һүҙҙәрен ебәрҙе "Муса", "Эльдорадо", "Егерь", "Ҡурай", "Бөрйән" һәм башҡа ҡушаматлы егеттәребеҙ. Һеҙгә ниндәйҙер ярҙам күрһәтә алыуыбыҙ менән бәхетлебеҙ. Барығыҙға ла имен-һау әйләнеп ҡайтырға яҙһын, ҡәҙерле ир-егеттәребеҙ! Рәхмәт һеҙгә! Фото: Салауат Юлаев исемендәге батальон.