Ҡыҙғанысҡа ҡаршы, республикала көн һайын янғындар булып тора һәм уларҙа кешеләр һәләк була. Уҙған төн дә тыныс балмаған. Мәҫәлән, Рәсәй Ғәҙәттән тыш хәлдәр министрлығының Башҡортостан буйынса баш идаралығынан хәбәр итеүҙәренсә, кисә кис Илеш районының Үрге Йәркәй ауылының Куйбышев урамында йорт яныуы тураһында хәбәр итәләр. Янғын һағы подразделениелары килгәнгә тиклем ашығыс медицина ярҙамы бригадаһы төрлө янғында йәрәхәт алған 1934 һәм 1960 йылғы ҡатындарҙы Үрге Йәркәй үҙәк район дауаханаһына алып киткән. Һүндереүгә Рәсәй Ғәҙәттән тыш хәлдәр министрлығы, Иҫке Күктау һәм Ҡарабаш ауыл советтарының ирекле янғын һүндереү командалары килгәндә 7х8 квадрат метр ҙурлығындағы йортто ут ялмап алған була. Ҡыҙғанысҡа ҡаршы, янғынды һүндергән саҡта утта һәләк булған 1933 йылғы ир кәүҙәһе табылған. Бөгөн таңға ҡарай, 5.08 сәғәттә, ведомствоға Миәкә районының Ҡырғыҙ-Миәкә ауылын да янғын уятҡан. Ауылдың Абдуллин урамында йорт янған. Янғын һүндереүселәр килгәндә ике фатирлы йорттоң береһен ут солғаған була. Ҡотҡарыусылар утты 15 минутта ауыҙлыҡлай. Тик, ҡыҙғанысҡа ҡаршы, 1968 йылғы һәм 1976 йылғы ирҙәрҙең үле кәүҙәләре табыла. Янғын урындарында ведомствоның янғын лабораторияһы, тәфтиш-оператив төркөм эшләй. Өфөлә лә Левитан урамында күп фатирлы йортта янғын булған. Ваҡиға урынына килгән ҡотҡарыусылар ике кешене ҡотҡарған, ете кешене эвакуациялаған. Күреүебеҙсә, янғын күп сораҡта төнгө ваҡытта сыға. Был кешеләрҙең уяулыҡты юғалтыуына, йоҡлауына ла бәйлелер. Шуға ла ятыр алдынан электр ҡорамалдарын, ут сығанаҡтарын һүндереп, янғын хәүефе булмауына инанғас ҡына, йоҡларға ятырға кәрәктер. Үҙегеҙҙе һәм яҡындарығыҙҙы һаҡлағыҙ, ут менән шаярмағыҙ! Фото: mchsrb