Кисә Баймаҡ – Амангилде – Сермән автомобиль юлының етенсе саҡрымында иртәнге сәғәт ун тирәһендә 84 йәшлек ир рулгә идараны юғалтып, юлдан ситкә сығып китә. Һөҙөмтәлә ул 80 йәшлек ҡатыны менән медицина ярҙамы һорап мөрәжәғәт иткән. Ярты сәғәттән һуң ошо уҡ юл участкаһында 42 йәшлек урындағы кеше идара иткән шул уҡ маркалы – “ВАЗ-2106” автомобиле аварияға осраған. Бәхеткә күрә, был юлы береһе лә зыян күрмәгән. Водителдәр әйтеүенсә, был участкала авария көслө ел арҡаһында килеп сыҡҡан. “Хөрмәтле водителдәр, хәтерегеҙгә төшөрәм, республиканың ҡайһы бер райондарында һауа шарттары боҙолдо, ҡар яуҙы. Күпселек водителдәрҙең бөгөнгө көндә йәйге тәгәрмәстәргә күсергә өлгөргәнен иҫәпкә алып, юл шарттарының яҡшырыуын көтөп, был райондарға барыуҙан тыйылырға, ә юлда һауа шарттарына ярашлы тиҙлек режимын һайларға, билдәләнгән араны үтәргә һәм маневр ҡағиҙәләрен боҙмаҫҡа кәңәш итәм. Барыһына ла хәүефһеҙ юлдар теләйем. Һауа торошоноң киҫкен ҡатмарлашыуын иҫәпкә алып, Дәүләт автоинспекцияһы хеҙмәткәрҙәре республика юлдарына яуаплы ойошмалар менән берлектә юл-транспорт ваҡиғаларына юл ҡуймау буйынса бөтә сараларҙы ла күрә”, – тип яҙҙы социаль селтәрҙә республика ЮХХДИ идаралығы начальнигы Владимир Севастьянов. Ял көндәрендә юлдарҙа аварияларға юл ҡуймау, юл хәрәкәте ҡағиҙәләрен боҙған водителдәрҙе асыҡлаҡ, эсеп рулгә ултырған кешеләрҙе тотоу маҡсатында ЮХХДИ хеҙмәткәрҙәре көсәйтелгән режимда эшләй, рейдтарға сыға. Әйткәндәй, бөгөн, 15 апрелдә, Ейәнсура районында түбәндәге йүнәлештәге юлдар бөтә төр транспорт өсөн дә 18.00 сәғәткә тиклем ябыҡ: – Магнитогорск – Ира юлының 241 – 287 километрында; – Үрге Сарабил – Ҡыуандыҡ юлының 0 – 55 километрында. Фото: @bash_gibdd