“Башҡортостан” гәзите “Бәйләнештә” социаль төркөмөндә “Иң яҡшы ауыл биләмәһе хакимиәте башлығы” конкурсын иғлан иткәйне. Унда республикабыҙҙың төрлө райондарынан иң уңған, әүҙем, егәрле, эшлекле 16 ауыл биләмәһе башлығы көс һынаша. Конкурсанттар араһында Ауырғазы районының Өршәк ауыл биләмәһенең хакимиәт башлығы Рәмил Исмәғил улы Абдрахманов та бар. Рәмил Исмәғил улы Абдрахманов 1966 йылда Ауырғазы районының Ҡорманай ауылында тыуған. 1973 – 1983 йылдарҙа Ҡорманай урта мәктәбендә уҡый. Мәктәпте тамамлағандан һуң бер йыл “Урожай” колхозында механизатор булып эшләй. 1984 – 1986 йылдарҙа Совет Армияһы сафында хеҙмәт итә. Хәрби хеҙмәттән һуң тыуған ауылына ҡайта. 1987 йылдың ғинуарында 2-се бригадаға бригадирҙың иҫәп буйынса ярҙамсыһы итеп тәғәйенләнә. Шул уҡ йылдың көҙөндә, имтихандарҙы уңышлы тапшырғандан һуң, Башҡортостан ауыл хужалығы институтына уҡырға инә. Иҡтисад факультетын тамамлағандан һуң “Яңы юл” колхозына баш иҡтисадсы итеп эшкә ҡабул ителә. 1996 йылдан бирле Өршәк ауыл биләмәһенең хакимиәт башлығы булып эшләй. Тәжрибәле етәксе ауыл тормошон яҡшы аңлай һәм уны үҫтереү өсөн биләмәне барлыҡ сараларҙа ла әүҙем ҡатнаштырырға тырыша. Мәҫәлән, Урындағы башланғыстарға булышлыҡ итеү программаһында 2016 йылдан ҡатнашып, һәр йыл һайын урындағы мәсьәләләрҙе хәл итеп киләләр: 2017 йылда Ҡорманай мәктәбенә капилаь ремонт эшләткәндәр, 2018 йылда “МТЗ 82.1” тракторын алғандар, 2019 йылда Иҫке Әпсәләм ауылындағы мәҙәниәт йортона капиталь ремонт эшләгәндәр, 2020 йылда Иҫке Тимешкә ауылы зыяратын төҙөкләндергәндәр. “Реаль эштәр” программаһы буйынса, 2017 йылда Ҡорманай ауылындағы балалар баҡсаһының һыу һәм канализация системаһына капиталь ремонт эшләткәндәр, 2019 йылда Бөйөк Ватан һуғышы яугирҙәренә мемориаль таҡта асҡандар. 2020 йылда “Һаулыҡ һаҡлауҙы үҫтереү” программаһы буйынса яңы фельдшер-акушерлыҡ пункты төҙөлгән. Ошо уҡ йылда “Башҡортостан Республикаһында янғын хәүефһеҙлеге” программаһы буйынса автономлы насосы булған тағылма янғын техникаһы алғандар. 2021 йылда Иҫке Әпсәләм ауылында Бөйөк Ватан һуғышы яугирҙәре һәйкәлен ремонтлағандар. 2022 йылда – “Башҡортостан Республикаһының ауыл биләмәләрен комплекслы үҫтереү” дәүләт программаһы сараларын тормошҡа ашырыу сиктәрендә Иҫке Әпсәләм ауылында “Спорт һәм ял паркы” асылған. ”2015–2017 йылдарға Башҡортостан Республикаһы Ауырғазы районы муниципаль районының Өршәк ауыл советы ауыл биләмәһендә энергияны һаҡлау һәм энергия һөҙөмтәлелеген арттырыу” муниципаль маҡсатлы программаһы буйынса йәмәғәт урындарын яҡтыртыусы тораҡ пункттарҙағы бөтә лампалар тулыһынса энергия аҙ сарыф ителгән лампаларға алмаштырылған. Сулпан ауылына юл ремонтлана, Сулпан – Андреевка юлына капиталь ремонт тамамланған, Собханғол – Сулпан юлына ҡом-ҡырсынташ ҡатнашмаһы һалынған. 2019 йылда Ҡорманай ауылындағы бөтә урам юлдарын тулыһынса ремонтлағандар. Шул уҡ 2020 йылда ауылдың Полевая урамы буйлап асфальт юл һалына, ошо уҡ йылда Иҫке Тимешкә ауылында юлдарҙы ремонтлап бөтәләр. Иҫке Тимешкә ауылындағы Ишан шишмәһе биләмәһе төҙөкләндерелгән. Шулай уҡ махсус хәрби операцияла ҡатнашҡан яугирҙәргә гуманитар ярҙам йыйыу буйынса ла тос өлөш индерә Өршәк ауыл биләмәһе халҡы. Әлбиттә, был тиклем эштәрҙе ғәмәлгә ашырыуҙа ауыл билмәһе башлығы, тәжрибәле етәксе Рәмил Исмәғил улы Абдрахмановтың өлөшө баһалап бөткөһөҙ. Артабан да уңыштар теләйбеҙ! Фото: Рәмил Абдрахмановтың шәхси архивынан.