Башҡортостандың ЮХХДИ идаралығынан хәбәр итеүҙәренсә, кисә киске сәғәт алтылар тирәһендә Олойылға – Ишле – Туҡан – Егәҙе автомобиль юлының 15-се километрында 58 йәшлек урындағы кеше, “КрАЗ” йөк автомобиле менән идара иткәндә юлдан ситкә сығып ауа. Юл-транспорт ваҡиғаһы һөҙөмтәһендә алған йәрәхәттәренән 50 йәшлек пассажир вафат булған. Автомобиль менән идара иткән кешенең водитель танытмаһы булмаған. Етмәһә, эскән килеш рулгә ултырған. Тикшереү һөҙөмтәһе уның ҡанында 0,809 мг/л этанол спирты барлығын күрһәткән. Шулай уҡ автомобилдең тейешле тәртиптә теркәлмәгәнлеге асыҡланған. Әле авария сәбәптәре асыҡлана. 2023 йылдың беренсе кварталында иҫерек водителдәр арҡаһында республикала дүрт кеше һәләк булған, 36-һы йәрәхәтләнгән. “Иҫегеҙгә төшөрәбеҙ, һәр кем үҙенең гражданлыҡ позицияһын күрһәтә һәм иҫерек килеш водителдәрҙең транспорт менән идара итеү факттары тураһында 112 һандары буйынса телефон аша хәбәр итә ала. Был хаҡта яҡындағы полиция бүлегенә лә хәбәр итергә мөмкин”, – ти республиканың ЮХХДИ идаралығы начальнигы Владимир Севастьянов. Фото: скриншот.