Билдәле булыуынса, республикала “Минең кесе ватаным – Атайсал” төбәк муниципаль форумдары үтте. Бөгөн Баймаҡ ҡалаһында проекттың һуңғы - алтынсы зона форумы тамамланды. Күләмле сарала Баймаҡ, Сибай, Белорет, Учалы, Межгорье ҡалалары, Баймаҡ, Әбйәлил, Белорет, Учалы, Бөрйән, Йылайыр, Ейәнсура, Хәйбулла райондары вәкилдәре ҡатнашты. Форум сиктәрендә, бер нисә урында төрлө майҙансыҡтар эшләне. Мәҫәлән, "Биләмәләрҙе комплекслы үҫтереү" секцияһында район һәм ауыл биләмәләре башлыҡтары, "Атайсал" проектында ҡатнашыусылар, шәхси эшҡыуарҙар, фермерҙар ҡатнашты. «Көслө идеялар - файҙалы ҡарарҙар» эшлекле уйыны формаһында үткән фекер алышыуҙа БР Стратегик асыштар үҙәге коммерцияға ҡарамаған автономиялы ойошмаһы директоры кәңәшсеһе Урал Ибраһимов етәкселегендә ауыл халҡының тормошон нисек яҡшыртырға, бюджеттан тыш финанслау сығанаҡтарын табырға, торлаҡ шарттарын яҡшыртырға, халыҡтың килемен арттырырға тигән кеүек һорауҙарға яуап табырға тырыштылар. "Медиакиңлекте үҫтереү" буйынса ойошторолған "түңәрәк өҫтәл"дә төрлө район һәм ҡаланың телевидение, электрон һәм баҫма киң мәғлүмәт саралары вәкилдәре, район һөм ҡала хакимиәттәренең мәғлүмәт-аналитика бүлеге белгестәре ҡатнашты. Сараның модераторы - "Ватандаш" журналының баш мөхәррире Рәшиҙә Мәһәҙиева. Киң мәғлүмәт саралары вәкилдәре "Атайсал" проектын нисек яҡтыртыуҙары тураһында тәжрибә уртаҡлашты, үҙ фекерҙәрен еткерҙе. Мәҫәлән, Баймаҡ районының башҡорт телендә сыҡҡан "Һаҡмар" гәзите мөхәррире Гүзәл Сәлихова "Атайсал" проекты гәзит биттәрендә йылдар буйы яҡтыртылыуы, уның сиктәрендә төрлө саралар, акциялар үтеүе хаҡында таныштырҙы. Бигерәк тә гәзит уҡыусылар менән берлектә экологик өмәләр, "Сылтыр шишмә" акцияһы хаҡында һөйләп үтте. "Атайсал" төбәк гәзитенең баш мөхәррире Хәйҙәр Тапаҡов үҙҙәренең гәзитендә "Минең Атайсалым" тип аталған конкурс иғлан ителеүе хаҡында һөйләне. Акцияны БР Дәүләт Йыйылышы - Ҡоролтай депутаты Денис Назаров күтәреп алған. Конкурс сиктәрендә, гәзит биттәрендә йәнтөйәк өсөн изге ғәмәлдәр башҡарыусылар хаҡында мәҡәләләр донъя күрәсәк һәм еңеүселәр йыл аҙағында билдәләнәсәк. «Яҡташтар ойошмаларының бөгөнгө көндәге роле» секцияһын Рита Өмөтбаева алып барҙы. «Бөгөнгө көндә яҡташтар ойошмаларының эшен көсәйтеү, уларҙы берләштерә торған саралар үткәреү мөһим» -, тине ул. Ҡатнашыусылар яҡташтар ойошмаларының бөгөнгө көндәге роле хаҡында фекер алышты, шулай уҡ майҙансыҡта Башҡортостан Республикаһының муниципаль берәмектәре менән үҙ-ара эш итеүҙең иң яҡшы тәжрибәләре өйрәнелде. Башҡа майҙансыҡтарҙа хәҙерге шарттарҙа яҡташтарҙы берләштереүҙең әһәмиәте, йәштәрҙе илһөйәрлек рухында тәрбиәләү, биләмәләрҙе комплекслы үҫтереү проекттары, брендтарҙы күтәреү, йәғни муниципалитеттарҙың танылыу яулауы, "Айыҡ ауыл" проектының әһәмиәте һәм мөмкинлектәре тикшерелде. Башҡортостан Республикаһы Башлығы Хакимиәте етәксеһенең беренсе урынбаҫары Урал Килсенбаев белдереүенсә, был форумдар тәү сиратта республика халҡын әүҙемләштереү һәм һәр кемдең тыуған төйәгенә ярҙам итә алыуын күрһәтеү өсөн уҙғарыла. Баймаҡта үткән алтынсы муниципаль-ара форумы яҡташтарҙың зона осрашыуҙары циклын тамамлай. «Беренсенән, урындарҙа башланғыстар һиҙелерлек күренһен, башҡа кешеләр ҙә ҡушыла алһын өсөн форумдар уҙғарҙыҡ. Һәм беҙ быға ирешә алдыҡ. Әгәр беренсе зона форумы мәленә сайтта 10 меңгә яҡын проект булһа, хәҙер улар - 17 мең. Республика форумына улар 20 мең булыр, тип ышанам. Был беҙҙең өсөн ҙур ҡыуаныс булыр ине! Икенсенән, бер көндә тотош республиканы күрһәтеп булмай. Шуға күрә райондарҙа ҡыҙыҡлы, кәрәкле проекттарҙың булыуын күреү өсөн алтынсы форумды үткәрәбеҙ. Шуны билдәләп үткем килә: республикабыҙ уникаль. Һәр райондың үҙенсәлеге бар»,- тип һыҙыҡ өҫтөнә алды Урал Килсенбаев. Сара тураһында тулыраҡ репортаж гәзитебеҙҙең киләһе һанында донъя күрәсәк. Автор фотолары.