Республика кардиология үҙәгенең баш табибы Ирина Николаева социаль селтәрҙәге битендә бер осраҡлы хәлдең ғүмерҙе һаҡлап ҡалыуы хаҡында һөйләгән. Үҙәк белгестәре үҙен шап-шаҡтай тойған 37 йәшлек ирҙең ғүмерен һаҡлап алып ҡалған. Ир эшкә урынлашыу өсөн медицина тикшереүен үтеп йөрөгән. Сәләмәт тормош менән йәшәгән, профессияһын алыштырыуҙы планлаштырған ир йөрәгенә бер ҡасан зарланмаған. Тик урындағы поликлиника табиптары уның аортаһы киңәйеүен диагностикалап, кардиология үҙәгенә өҫтәмә тикшеренеү үтергә ебәргәс, ҡорған пландар селпәрәмә килә. Кардиолог эргәһендә ултырғанда, егет 2022 йылда күкрәк тәңгәлендә яндырғыс ауыртыу тойоуын, әммә үтеп китеү менән уны онотоуын иҫкә төшөрә. Эхокардиограмма һәм компьютер томографияһы ҡатланыу билдәләре булған 12 сантиметрлыҡ аневризма барлығын күрһәтә. Өҫтәүенә аневризма йөрәкте һәм уның эргәһендәге ағзаларҙы ҡыҫа. Иң ҙур хәүефе шунда – уның ҡатлауланыуы һәм йыртылыуы эске ҡан ағыуына килтереүе һәм кешенең бик тиҙ үлеүенә сәбәпсе булыуы ихтимал. Табиптар шул уҡ көндә иргә ашығыс рәүештә операция яһай. Бүлексә мөдире Рәмил Ишбулдин етәкселегендәге табиптар бригадаһы алты сәғәт буйына пациенттың ғүмерен һаҡлап ҡалыу өсөн көрәшә. Аорта аневризмаһы аорта клапаны менән бергә алып ташлана, йөрәк клапаны протезы имплантациялана, коронар артериялар тегелә... Операция уңышлы үтә. “Хәҙер пациент һауыға башланы, дауалау курсы тамамланыуға яҡынлаша. Оҙаҡламай йәшәү урыны буйынса реабилитация үтә башлаясаҡ. Бындай хәлгә тарымаҫ өсөн, ниндәй йәштә булыуығыҙға ҡарамаҫтан, күкрәктә кинәт ауыртыу тойғанда, аң юғалтҡанда табиптарға мөрәжәғәт итегеҙ. Ҡан баҫымын тикшерегеҙ, ваҡытында диспансерлаштырыу үтегеҙ”, тип кәңәш бирә Ирина Николаева. Ирина Николаева фотоһы.