Саллы фәнни хезмәтнең авторлары булып Башкортстан авыллары тарихын, тел үзенчәлекләрен тикшерүче абруйлы галимнәр чыгыш ясый. Алардан тарих фәннәре кандидаты, билгеле журналист Салават Хәмидуллин һәм шәҗәрә буенча белгеч Альберт Исмаил басманың исем туе чарасында катнашты. Салават Ишмөхәммәт улы үзенең чыгышында соңгы ике дистә елдан артык дәвердә кече Ватан тарихы темасына игътибарның кискен артып, моның нәтиҗәсе буларак, туган якны өйрәнүчеләр, журналистлар һәм урындагы активистлар тарафыннан авыллар тарихына багышлап чыгарылган хезмәтләрнең күбәюен билгеләде. Әлеге күренеш, нигездә, уңай яктан бәһаләнсә дә, тарихи язмаларда һәм китапларда тарихи чынбарлык фәнни яссылыкта чагылдырылмый, архив материалларында терминнар үз асылыннан чыгып кулланылмый. Тәкъдим ителгән тарихи белешмә бу юнәлештә бәхәсле чыганакларга ачыклык кертеп, теманы да тирәнрәк ачуга юнәлеш бирә, чөнки китапта Башкортстан тарихындагы этник процесслар барлык тулылыгы белән яктыртылган. Гади генә итеп әйткәндә, Салават Хәмидуллин фикеренчә, китапның гыйльми яктан бәһасе, нәкъ шуннан гыйбарәт. Туймазы башкорт тарихи-мәдәни үзәге баш белгече Альберт Исмаил, шәҗәрәләр төзүдә махсуслашып, республиканың Көнбатышында бу өлкәдә киң танылу алды. Китапта аның тәрҗемәсендә Башкортстан Милли архивында сакланган Ырынбур мөселман Диния нәзарәтенең метрика кенәгәләреннән күчермәләр бирелгән. Китапханәдә очрашуда ул шәҗәрә төзү буенча осталык дәресләре бирде. Фәнни белешмәдә хәзерге Благовар районы авылларының килеп чыгышына һәм төбәкнең этник яктан катнаш торак пунктларына да зур урын бирелә. Атап әйткәндә, Благовар районында, мәсәлән, төрки телле халыклардан Татарстаннан, Рязань һәм Тамбов төбәкләреннән күченеп килгән мишәрләр, морзалар һәм дәүләт крестьяннары нигез салган авыллар да бар.