Рәсәйҙә иғлан ителгән Уҡытыусы һәм остаз йылы Сибай институтында бик йәнле үтә, төрлө сағыу ваҡиғаларға бай булыуы менән айырылып тора. Был эштәрҙең барыһын да ойоштороуҙа педагогика факультеты деканы, педагогия фәндәре кандидаты, доцент Лилиә Рәдиф ҡыҙы Фәйзуллинаның роле баһалап бөткөһөҙ ҙур. – Уҡытыусы һәм остаз йылы беҙҙең уҡыу йорто өсөн яңы мөмкинлектәр аса һәм етди яуаплылыҡ та өҫтәй, сөнки Сибай институты төбәк өсөн белгестәр әҙерләү менән оҙаҡ йылдар шөғөлләнә һәм яҡшы күрһәткестәргә өлгәшә. Рәсәй Хөкүмәте вице-премьеры Дмитрий Чернышенко билдәләүенсә, Уҡытыусы һәм остаз йылының төп маҡсаттарының береһе – юғары уҡыу йорттарын сифатлы итеп нығытыу, шулай уҡ остаздарҙың хәрәкәтен киң таратыу. Был йәһәттән беҙҙең белем усағында фәнни остазлыҡты үҫтереү өсөн һәр кафедрала студенттарҙың фәнни берекмәләре, ғилми лабораториялар сиктәрендә йәш ғалимдар советтары булдырылған, шул рәүешле тикшеренеүселәр быуыны араһында күсәгилешлелек тәьмин ителә. Беҙҙә исемле йылды асыу бик тантаналы шарттарҙа үтте, сара барышында педагогик хеҙмәт ветераны, Башҡортостан Республикаһының атҡаҙанған халыҡ мәғарифы хеҙмәткәре, РСФСР-ҙың халыҡ мәғарифы отличнигы, Сибай институтына нигеҙ һалған почетлы юғары һөнәри белем биреү хеҙмәткәре Вәкил Хажин менән видеобәйләнеш аша аралашыу көтөлмәгән матур бүләк булды. Уҡытыусылар остазлыҡ традицияларын ойоштороуҙа үҙ тәжрибәһе менән уртаҡлашты, һәр кем үҙ остазына рәхмәтен еткерҙе һәм теләктәрен әйтте. Сарала шулай уҡ Сибай институтында ҡасандыр белем алған студенттар, төрлө өлкәләрҙә эшләгән һәм Сибай институтына, ҡалаға, республикаға файҙа килтергән шәхестәр ҡатнашты. Улар дәртләнеп остаздарҙың тормошта ниндәй роль уйнауы хаҡында һөйләне, уларҙың һөнәри оҫталығы, фиҙакәр хеҙмәте, ярҙамы, ихласлығы өсөн рәхмәт әйтте. Йыл дауамында был юҫыҡта төрлө саралар планы төҙөлгән, улар һәр факультет һәм уҡыу йорто кимәлендә үтәсәк. Йыл аҙағында Уҡытыусы һәм остаз йылына йомғаҡ яһап, иң яҡшы уҡытыусы һәм остаз билдәләнәсәк, – ти Лилиә Рәдиф ҡыҙы. Һөнәрсе һәм өйрәнсек Һәр кемдең тормошта айырым роль уйнаған, һәр ваҡыт йылылыҡ һәм рәхмәт һүҙҙәре менән иҫкә алған уҡытыусыһы, остазы бар. Сибай институтында ҡасандыр ошо уҡыу йортон тамамлап, фән менән шөғөлләнеп, төрлө дәрәжәләргә эйә булып, бөгөн үҙҙәренең остаздары менән бергә эшләүселәр бик күп. Институттың тәүге көндәренән студенттарға биология, экология һәм тирә-яҡ мөхитте өйрәнеү буйынса һабаҡ биргән биология фәндәре докторы, академик Йәлил Һөйөндөков элекке студенттары – биология фәндәре кандидаты, доцент һәм директорҙың социаль-тәрбиәүи эш буйынса урынбаҫары Айрат Булат улы Зөлҡәрнәев менән биология фәндәре кандидаты, доцент Юлиә Александровна Ҡолоеваның фәнни ҡаҙаныштарынан бик ҡәнәғәт. Ике доктор һәм 14 фән кандидаты әҙерләгән академик Йәлил Һөйөндөков үҙенең һәр уҡыусыһы менән сикһеҙ ғорурлана. “Уҡытыусы өсөн уҡыусыһының уңышын күреү, уның еңеүҙәрендә ниндәйҙер кимәлдә һинең дә хеҙмәтең булыуҙы тойоу – оло шатлыҡ һәм яуаплылыҡ”, – ти Йәлил Төхвәт улы. “Мультикомп” изгелек өләшә Сибай институтында күптән инде ирекмәндәр хәрәкәте әүҙем эшләй. Төрлө йылдарҙа ул төрлө исемдәр менән йөрөтөлһә лә, ҡылған ғәмәлдәре бары тик изгелек һәм миһырбанлыҡҡа ҡайтып ҡала. Бөгөн “Мультикомп” ирекмәндәр хәрәкәтен йәш һәм дәртле Венера Сәйетбатталова етәкләй, ә үҙәктең рәйесе – иҡтисад һәм хоҡуҡ факультетының өсөнсө курс студенты Илнур Шәрәфетдинов. Ирекмәндәр хәрәкәтендә ҡатнашҡан ҡыҙҙар һәм егеттәр әйтеүенсә, бөтә эштәрҙе улар күңел ҡушыуы буйынса башҡара, бер кем дә мәжбүр итмәй. Иң мөһиме – шәфҡәтлелек һәм мибырбанлылыҡ, изгелек кеүек сифаттарға эйә булыу, кешеләр менән аралаша белеү, кәрәк саҡта ярҙам ҡулы һуҙыуҙан тартынмау һәм алға ынтылыу. “Теге өсәү” бында ла бар Уҡыу йортоноң матбуғат хеҙмәте ун йылдан ашыу эшләй. Бында журналистика, видео төшөрөү серҙәренә төшөнәләр. Бөгөн һәр кем был тармаҡты яҡшы үҙләштерергә тейеш. Етәкселәре Рәүилә Хәсәнова медиамөхитте яулау, унда үҙ урыныңды табыу юлдарына өйрәтә. Әлеге ваҡытта етәксе алтынсы быуын журналистарын әҙерләй. Былтыр уҡыуҙы тамамлаған Илдус Сурин әле РБК каналында өлкән оператор булып эшләй. Бөгөн видеоматериалдар төшөрөү менән иҡтисад һәм хоҡуҡ факультетының III курс студенты Айнур Ҡәйепов шөғөлләнә. Тәбиғи математика факультетының III курсы студенты Ильяс Күҙәбаев сифатлы фотоһүрәттәр өсөн яуаплы. Ул был шөғөл менән бала саҡтан ҡыҙыҡһына, әле дуҫы Федор Огневты (ул да ошо факультетта III курста уҡый) фото төшөрөргә өйрәтә. Өс егет өс таған кеүек татыу, берҙәм эшләй. Йәш һәм дәртле егеттәр ҡалала үткәрелгән сараларҙы ла әүҙем яҡтырта. Кәримә УСМАНОВА