Башҡортостанда яҙғы баҫыу эштәре бара. Республикабыҙҙың төп иҡтисади тармағы һаналған ауыл хужалығы хеҙмәткәрҙәре яңы миҙгелде түҙемһеҙлек менән көтөп алды. Уларҙың бар теләге – һауа шарттары ҡулай килһен. Нисек кенә булмаһын, Башҡортостандың тәбиғәт шарттары ауыл хужалығы менән шөғөлләнгән кешеләрҙе даими һынай: яҙын ҡаты ҡырауҙар төшөүе ихтимал, йәйгеһен ҡоролоҡ булыуы, көҙөн уңышты йыйып алыуға ҡойма ямғырҙар ҡамасаулауы мөмкин. Шулай ҙа тәбиғәт көйһөҙлөктәренә бирешмәй ер хеҙмәтсәндәре. Әле уларҙың төп маҡсаты – яҡшы уңыш йыйып алыу өсөн яҙғы эштәрҙе ваҡытында атҡарып өлгөрөү, ашламалар индереү. Көндәрҙең йылы булыуы Стәрлебаш районы хужалыҡтарына ужым ашлыҡтарын туҡландырыу мөмкинлеген бирә. Стәрлебаш районының “Правда”, “Күндерәк”, “Заря”, “Уңыш”, “Стәрлебаш АГРО” һәм Ленин исемендәге хужалыҡтарында яҙғы баҫыу эштәре бара. Район буйынса барлығы 72657 гектар баҫыу эшкәртеүҙә, 9945 гектарын ужым культуралары биләй. Ә уларҙың ҡышлау шарттары иһә буласаҡ уңышҡа ҙур йоғонто яһай. Беҙ барған “Уңыш” яуаплылығы сикләнгән йәмғиәтенең ауыл хужалығы предприятиелары көҙҙән 682 гектар майҙанда ужым культуралары сәскән. Шуларҙың 250 гектарында – арыш, 432 гектарҙа бойҙай сәселгән. “Әле гектарына 100 – 120 килограмм ашлама индерәбеҙ. Ужым культуралары яҡшы ҡышлаған. Үҫентеләр һәйбәт кенә. Уларҙы сәскәндә лә ашлама индергәйнек. Көҙгө уңыштың яҡшы булырына өмөт ҙур”, – тип һөйләне хужалыҡ етәксеһе Илдар Ғәскәров. Әле баҫыуҙарға аммиак селитраһы индерелә. Хужалыҡтың Ҡаранай ауылы эргәһендәге баҫыуҙарында эш ҡайнай. Тракторсылар Иҙрис Фәхриев, Данир Саҙриев, Айнур Ғәскәров, водитель Миңлевәли Атанғолов, заправкалаусы Роберт Фәхриев йылы көндәрҙә эште тамамлап өлгөрөргә тырыша. “Сәсеү, уңыш йыйып алыу ваҡытында ярҙамға сығам. Ә үҙем 12 йәшемдән баҫыуҙарҙа эшләп өйрәнгәнмен. Әле иртәнге сәғәт һигеҙҙән ҡояш байығанға тиклем баҫыуҙабыҙ”, – ти Иҙрис Миҙхәт улы. Ауыл хужалығы хеҙмәтсәндәренең сираттағы миҙгелгә әҙерлеген яҙғы сәсеү эштәре һынаясаҡ. “Уңыш” хеҙмәтсәндәре был үҙенсәлекле “имтихан”ды уңышлы үтер, тигән өмөттәбеҙ. - Айһылыу НИЗАМОВА Стәрлебаш районы.