Думбыраны ла, скрипканы ла уҡыусылары менән эшләгән

20 йылдан ашыу Дәүләкән ҡалаһының 4-се лицейында технология фәненән уҡытҡан Рәсәйҙең һәм Башҡортостандың атҡаҙанған уҡытыусыһы Валерий Шәрәфетдинов уҡыусыларын ябай сувенирҙарҙан алып, ҡатмарлы музыка ҡоралдарына тиклем эшләргә өйрәтә. Уҡытыусының дөйөм педагогия стажы 40 йыл. Балалар менән берлектә башҡарған думбыра, скрипка, ҡурай ҡарап тороуға ғына матур түгел, бына тигән тауыштар, моң сығанағы ла. Һәләтле уҡытыусы үҙенең уҡыусыларының уңыштары менән дә ғорурлана. Бөтә Рәсәй олимпиадаларында республика кимәлендә генә түгел, һуңғы йомғаҡлау этабында ла еңеүсе, призер исемдәрен яулайҙар. Мәҫәлән, 2021 йылда бер уҡыусыһы еңеүсе, икенсеһе призер булған. Мәҫәлән, 10-сы класс уҡыусыһы Егор Михайлов скрипка яһап, быйыл республика кимәлендәге олимпиадала призер булған. Әйткәндәй, Егор музыка мәктәбендә лә уңышлы шөғөлләнә. Ағас эше менән шөғөлләнгән һайын тәжрибә менән бергә оҫталыҡ та арта. Тағы ла бер уҡыусыһы Кирилл Пащенко стенаға элеп ҡуйырға яҡтыртҡысты думбыра формаһында эшләгән. Был эш тә бик үҙенсәлекле, ҡупшы килеп сыҡҡан. Ошо ҙур ҡаҙаныштарҙың нигеҙендә Валерий Файзр улының бала саҡтағы ағас эшенә ҡыҙыҡһыныуы ята. “Тәүге эшем - 3-4-се класта уҡығанда елкәнле карап ине. Аҙаҡ машина, трактор кеүек төрлө уйынсыҡтар эшләргә лә оҫтарҙым", - ти ул. Ағас эше оҫтаһы буш ваҡытында үҙенең оҫтаханаһында ижад менән күңел ялы ала. “Оҫтаханама бер-ике көн инмәһәм, үҙемә урын таба алмайым”, ти ул яратҡан шөғөлө тураһында. Фотолар: Валерий Шәрәфетдинов архивынан.