“Догаларыбыз сезне саклап йөртсен!”

Шушы көннәрдә авыл халкы ярдәме белән алынган азык-төлек һәм хәрбиләргә кирәк булган башка әйберләрне “Изге Нәүруз” мәчетендә тартмаларга тутырып, Украинада хезмәт иткән якташларына җибәрү өчен әзерләп куйдылар.Шунысын да билгеләп үтәсем килә: районыбызның бер генә авылы да бу изге эштән читтә калмады. Менә кечкенә Сарт-Нәүруз авылында яшәүчеләр дә шулар исәбендә. Авылның активисты Альфира апа Мортазина әйтүенчә, мобилизация игълан ителү белән алар авылдашлары белән берничә тапкыр мәчеткә җыелышып, табыннар корып, бергәләп илдәге тынычлыкны, солдатларның исән-имин әйләнеп кайтуын теләп, Коръән мәҗлесләре үткәргәннәр, догалар юллаганнар. Халыкара хатын-кызлар көне уңаеннан мобилизацияләнгән егетләрнең әниләрен, хатыннарын мәчеткә җыеп, аларга бәйрәм табыны оештырганнар. Күптән түгел генә махсус хәрби операциядән ялга кайткан егетләрне дә мәчеткә чакырып, кунак иткәннәр.- Күреп-ишетеп торабыз, барлык авылларда хәйрия акцияләре уза. Без үзебез дә Прибельский авыл биләмәсе хакимияте, мәдәният йорты оештырган чараларда даими катнашабыз. Авылның хатын-кызлары шәмнәр ясарга да йөрде, әле җыелышып маскировка челтәрләре үрәбез. Үзебезнең авылдан аерым күчтәнәчләр җибәрергә булдык. Җыелышып токмач кистек. Аны гына җибәреп булмый бит, кызлар белән сөйләшеп акча җыйдык. Беркем дә каршы килмәде. Киресенчә, бу эшкә кушылучылар бик күп булды. Безнең кечкенә авылдан 23 мең сум акча җыеп, шуңа солдатларыбыз өчен куертылган сөт, тушенка, кәнфитләр, чәй һәм башка кирәк-яраклар сатып алдык, - ди Альфира Хаҗигали кызы.Акчаны җыю гына түгел, мөһим әйберләне сатып алуны да ул үз өстенә алган. Ләкин авылдашларының бердәм булуына сөенеп бетә алмый ул. Нинди генә тәкъдим белән чыксак та, хуплап алалар, ярдәм кулы сузалар, ди әңгәмәдәшчем, авылдашларына рәхмәтләрен белдереп.Чынлап та, хәтта авылны төзекләндерү эшләрен дә сарт-нәүрузлылар, башлыча, үз көчләре белән хәл итә. Узган елда авыл уртасында шушы авылда туып-үскән Наил Равилов башлангычы һәм авыл халкы көче белән Габдулла Тукай скверы барлыкка килде. Аны төзекләндерү дәвам итә һәм ул тагын да күркәмрәк булачак. Экологик өмәләрне дә даими оештырып торалар. Әлеге вакытта мәчеткә “зәңгәр ягулык” үткәрү өчен тырышалар. Имам-хатыйп Руслан Котлыяров әйтүенчә, бу эштә авылдан читтә яшәүчеләр дә зур ярдәм күрсәтә. Әйе, башкача булуы мөмкин дә түгел. Кайчандыр зур мәктәп, авыл Советы хакимияте урнашкан авылда бүген халыкның бердәнбер очрашу, җылышу һәм мөһим мәсьәләләрне хәл итү урыны – ул мәчет. Биредә дини бәйрәмнәр дә оештырыла, Ислам нигезләрен өйрәнү буенча дәресләр дә үткәрелә һәм барлык изге эшләргә башлангыч та шунда салына.Менә бу көнне дә авылның активистлары бик изге ният белән җыелды. Махсус хәрби операциядә катнашучы якташларына һәрбер посылканы барлык күңел җылысын, изге теләкләрен теләп тутырды. Һәр тартмада авылдашлары язган җылы эчтәлекле хатлар, догалар да урын алды. Алар егетләрне иң авыр вакытларда да дәртләндереп торыр, бәла-казалардан саклап йөртер. Амин!Автор фотолары.