Башҡортостандың иң яҡшы уҡыусылары тәүге паспортты тантаналы шарттарҙа аласаҡ

12 апрель, Космонавтика көнөндә, “Беренселәр хәрәкәте” Рәсәй балалар һәм йәштәр хәрәкәте “Беҙ – Рәсәй граждандары!” Бөтә Рәсәй акцияһының старт алыуы тураһында белдерҙе. Уның сиктәрендә уҡыуҙа, ижад өлкәһендә, спортта, йәмәғәт эшендә алдынғылар тәүге паспортын тантаналы шарттарҙа аласаҡ. Ямал Ненец автономиялы округынан, Алтай крайынан, Дағстан, Татарстан республикаларынан, Калининград, Әстрхан, Новосибирск, Тула, Ырымбур өлкәләренән һәм Мәскәүҙән уҡыусылар был акцияның тәүге ҡатнашыусылары булған да инде. “Беренселәр хәрәкәте” республика ойошмаһының рәйесе Ранис Хәсәнов билдәләүенсә, “Беҙ – Рәсәй граждандары” акцияһы бик мөһим сара – ул белемде тәрәнәйтә һәм Рәсәй гражданы булараҡ үҙеңә мөнәсәбәтте үҙгәртә. - Церемония мәлендә үҫмерҙәр илебеҙҙең гимнын башҡара, ил гражданының антын ҡабатлай. Паспорт бирелгәндә билдәле кешеләрҙең ҡатнашыуы бик әһәмиәтле. Йәш быуынды илһөйәрлеккә өйрәтергә кәрәк тип уйлайым, - тине Ранис Хәсәнов. - 14 йәшлек уҡыусыларға тәүге паспорттарын тапшырыу күптән изге йолаға әйләнгән. Тәүге мөһим документын ҡулға алыу һәр үҫмер өсөн иҫтәлекле ваҡиға булырға тейеш, - тине “Беренселәр хәрәкәте”нең Рәсәй идаралығы рәйесе Григорий Гуров. Быйылғы уҡыу йылында илдең 89 төбәгенән 500 мең үҫмер тәүге паспортын тантаналы шарттарҙа аласаҡ. Ойоштороусылар “Беҙ - Рәсәй граждандары” акцияһы йылдан-йыл киңерәк ҡолас алыр тип ышана.