Был конкурста класс етәкселәре лә, урта һөнәрселек белем биреү төркөмдәре кураторҙары ла ҡатнаша ала. Был форум Мәскәүҙә 3 октябрҙән 7-һенә тиклем уҙғарыласаҡ. Тотош илдән барлығы 3000 ҡатнашыусы көтөлә. Был педагогия форумының төп маҡсаты – класс етәкселәренең һөнәри берләшмәһен үҫтереү. Быйыл форум ике сменала үтәсәк: тәүгеһендә башланғыс кластарҙың, коррекция мәктәптәренең класс етәкселәре һәм урта һөнәрселек белем биреү кураторҙары ҡатнашасаҡ. Икенсеһенә өлкән һәм урта класс етәкселәре йәлеп ителә. Башҡортостан педагогтары элекке форумдарҙың эшендә лә әүҙем ҡатнашты. Класс етәкселәренең I Бөтә Рәсәй форумында Башҡортостандан делегацияла 17 уҡытыусы булһа, II форумда Мәскәүгә 25 педагог юлланды. Уларҙың береһе, Нефтекама ҡалаһынан инвалид балаларҙы дистанциялы уҡытыу республика үҙәгенең башланғыс кластар уҡытыусыһы Зимфира Йосопова конкурс хаҡында тәьҫораттары менән уртаҡлашты: - Минең өсөн класс етәкселәренең Бөтә Рәсәй форумы саф һауа йотомо һымаҡ булды. Ул үҙемә ышанысты арттырҙы, педагогика һәм тәрбиә мәсьәләһендә ярҙам итте, яңы һөнәри офоҡтар асты. Шулай уҡ форум мине Рәсәйҙең төрлө төбәктәренән хеҙмәттәштәрем – ҡыҙыҡлы ижади кешеләр менән таныштырҙы, - тип форумда ҡатнашыуынан ҡәнәғәт булыуын белдерҙе Зимфира Фәнәүи ҡыҙы. Класс етәкселәренең Бөтә Рәсәй форумы Рәсәйҙә иғлан ителгән педагог һәм остаз йылының төп сараларының береһе булып торасаҡ.