“Башинформ” агентлығында алдан тауыш биреү буйынса матбуғат конференцияһы үтте. Унда “Берҙәм Рәсәй” партияһы башҡарма комитетының төбәк бүлексәһе етәксеһе Руслан Насретдинов Башҡортостандың Дәүләт Йыйылышы – Ҡоролтайға алдан тауыш биреүҙә ҡатнашыу өсөн 781 кеше ғариза биреүе, уларҙың 712-һе теркәлгән, ҡалғандары ҡаралыуы тураһында хәбәр итте. Уның һүҙҙәренсә, алдан тауыш биреүҙә ҡатнашырға теләүселәрҙең 61,5 проценты – ир-егеттәр (480 кеше), 38,5 проценты – ҡатын-ҡыҙҙар (301 кеше), 35 йәшкә тиклемге йәштәр – 27,5 процент (215 кеше). Заявка биреүселәрҙең күпселеге партия ағзалары һәм яҡлылар. Партияһыҙ ҡатнашыусылар әлеге ваҡытта 174 кандидат, тағы 35 кеше – төбәк парламентының ғәмәлдәге депутаттары. Унда ҡатнашырға теләгән иң өлкән кандидат, депутат Валерий Шәриповҡа – 78, иң йәше, Өфө фән һәм технологиялар университеты студенты Сәйет Дустаметовҡа 20 йәш. Башҡортостанда 27 апрелгә тиклем Дәүләт Йыйылышы – Ҡоролтайға алдан тауыш биреүҙә ҡатнашыу өсөн кандидаттар күрһәтелә. Тауыш биреү 22 – 28 майҙа электрон форматта үтәсәк, уның йомғаҡтары тамамланғандан һуң ике көн эсендә яһаласаҡ. – 17 апрелдән башланған иң мөһим этапты сайтта тауыш биреү мөмкинлеге өсөн һайлаусыларҙы теркәүҙе атарға мөмкин. Шуныһы иғтибарға лайыҡ, алдан тауыш биреү процедураһы тик электрон форматта үтә. Шуға күрә теркәлеү “Дәүләт хеҙмәттәре” аша верификация үтәсәк. Был тауыш биреү форматы бик уңайлы, сөнки тәүлектең теләһә ҡайһы ваҡытында, интернет тотҡан урында тауыш бирергә мөмкин, – тине Руслан Насретдинов. Теркәү процедураһы менән техник ҡыйынлыҡтар килеп тыуған осраҡта техник ярҙам һорап мөрәжәғәт итергә мөмкин, тип билдәләне “Берҙәм Рәсәй” партияһы башҡарма комитетының төбәк бүлексәһе етәксеһе Руслан Насретдинов. “Ысынлап та, республикабыҙҙа электрон тауыш биреү, хатта праймериз форматында ла үткәреү тәжрибәһе юҡ. Шуға күрә, әлбиттә, ҡайһы бер һорауҙар тыуасаҡ. Беҙ ҡыҫҡа ҡулланмалар әҙерләйбеҙ, шул иҫәптән видеоформатта ла, уларҙы күпләп таратасаҡбыҙ. Тауыш биреү процедураһы һәм теркәү алгоритмдары тураһында мәғлүмәтте ентекләп аңлатырға тырышасаҡбыҙ. Шулай уҡ беҙҙә мәғлүмәт пункттары эшләйәсәк. Республикала партияның 4200-ҙән ашыу беренсел бүлексәһе бар. Улар һайлаусыларға ярҙам итеү процесына йәлеп ителәсәк”, – тине ул. Быйыл республикала “Берҙәм Рәсәй” партияһының алдан тауыш биреү сараһы тәүге тапҡыр онлайн форматта ғына үтәсәк. Дәүләт Йыйылышы – Ҡоролтай Рәйесе Константин Толкачев әйтеүенсә, коронавирус пандемияһына тиклем алдан тауыш биреү процедураһы һәр ваҡыт шәхсән кешенең туранан-тура ҡатнашлығында уҙған. Һуңынан ҡатнаш система ҡулланыла башлай: тауыш биреү участкаһына барып һәм онлайн тауыш биреү. Быйыл Башҡортостанда алдан һайлауҙарҙы тәүгә электрон төрҙә генә үткәрергә ҡарар ителгән. Рәсәйҙең яңы төбәктәрендә генә был сара халыҡтың туранан-тура ҡатнашлығында үтәсәк. – Онлайн-тауыш биреү объектив һөҙөмтәләр бирә. Теге йәки был кандидатты үтеү өсөн субъектив факторҙарҙы ҡулланыу мөмкин түгел. Шулай уҡ был күп һанлы кешеләргә төп һайлауҙарҙа партия исеменән сығыш яһаясаҡ кандидаттарҙы алдан һайлап алыу процедураһында ҡатнашырға мөмкинлек бирә, – тине төбәк парламенты спикеры. Константин Толкачев журналистар менән осрашыу барышында төбәк парламентына депутатлыҡҡа кандидаттың камил портретын һүрәтләп үтте. Мәҫәлән, уның һүҙҙәренсә, кеше илһөйәр булырға, кешеләрҙе яратырға, закон сығарыу эшмәкәрлегенең юридик нигеҙҙәрен һәм принциптарын белергә, идара итеү практикаһына эйә булырға, һайлаусыларға биргән һүҙен тота белергә тейеш. “Әлбиттә, танылыуһыҙ депутат булыу мөмкин түгел. Кешеләр кемгә тауыш биреүҙәрен белергә тейеш. Кандидаттың теләһә ниндәй портретын эшләргә мөмкин. Әммә ул депутаттарға йөкмәтелгән ауыр бурыстарҙы үтәүгә ни тиклем әҙер буласаҡ?” – тип билдәләне Константин Толкачев. Әйткәндәй, кандидаттар араһында махсус хәрби операцияла ҡатнашҡан ике яугир ҙә бар. – Алдан тауыш биреүҙә махсус хәрби операция яугирҙәре ҡатнашасаҡ. Улар - тормошто белгән кешеләр, улар илгә булған мөхәббәтен, уның өсөн барыһын да эшләргә әҙер булыуын, хатта фиҙакәрлеген ғәмәлдә күрһәткән. Был - мөһим кешеләр категорияһы, – тип билдәләне Дәүләт Йыйылышы – Ҡоролтай Рәйесе. Автор фотоһы.