ՔՊ-ական պատգամավոր, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը խոստովանել է, որ Տեղ-Կոռնիձոր հատվածում տեղի ունեցածը նաև թերությունների արդյունք է:
«Օրեր առաջ ես հաստատել եմ, թերությունների գոյությունը, որոնք չպետք է լինեին: Դրանք առաջացել են, քանի որ գուցե չի գիտակցվել, թե հակառակորդն իրեն ինչպես կպահի և մեր դիրքավորումներն ինչպիսին պետք է լինեն: Այո, թերացել ենք, թերացումների արդյունքում նրանց կողմից եղել է առաջխաղացում: Թերացումների մասին խոսակցությունից օրեր անց եղել է ԱԱԾ տնօրենի հրաման՝ սահմանապահ զորքերի հրամանատարի փոփոխության մասին, ավելին, անգամ ծառայողական քննություն է նշանակվել»,-Առաջին ալիքի եթերում ասել է Քոչարյանը:
Նա նաև հաստատել է, որ ապրիլի 11-ին վիրավորվածների թվում է նաև հատուկ բանակային կորպուսի հարմանատար Արմեն Գյոզալյանը: Նրա խոսքով՝ նա այնտեղ զբաղվել է վերոնշյալ թերացումների շտկմամբ:
Հիշեցնենք, որ ապրիլի 11-ին՝ ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Տեղի ունեցածի հետևանքով հայկական կողմը 4 ոհ և 6 վիրավոր ունի:
Ավելի վաղ Armenia Today-ի հետ զրույցում Տեղի բնակիչները հայտնել էին, որ կրակոցների ձայներ են լսել։
Մարտի 30-ի երեկոյան ՀՀ ԱԱԾ-ն հաղորդել էր, որ ադրբեջանական կողմը Սյունիքի սահմանային հինգ հատվածներում 100-300 մետր ավելի առաջ է տեղակայվել։ Նշվում էր, որ տեղակայման ընթացքում ի հայտ են եկել քարտեզների տարընթերցումներ: Որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ: