Երեկ տեղի ունեցած ադրբեջանական սադրանքի վերաբերյալ տեղեկացվել է Եվրոպական Միության միջնորդական առաքելությանը։ Այս մասին հայտարարել է Արտաքին գործերի նախարար Արարատ Միրզոյանը ԱԺ-կառավարություն հարցուպատասխանի ժամանակ։
«Այսօր արդեն ԵՄ մամուլի ծառայությունը հաստատել է, որ հայկական կողմը տեղեկացրել է իրենց Ադրբեջանի ագրեսիվ գործողությունների և փոխհրաձգության վերաբերյալ։ Նաև նրանք նշել են, որ իրենք տեղում չեն եղել այդ պահին, բայց իրենց դիտարկումներն արել են։ Նրանք Բրյուսելում Եվրոպական միության արտաքին ծառայությանն են զեկուցում, ինչը ոչ հրապարակային է»,- ասաց Միրզոյանը՝ հավելելով, որ այդ մասին տեղեկություն չունեն։
Հիշեցնենք, որ այսօր՝ ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Նախնական տվյալներով հայկական կողմն ունի զոհեր և վիրավորներ:
Այսօր ավելի վաղ Armenia Today-ի հետ զրույցում Տեղի բնակիչները հայտնել էին, որ կրակոցների ձայներ են լսել։
Մարտի 30-ի երեկոյան ՀՀ ԱԱԾ-ն հաղորդել էր, որ ադրբեջանական կողմը Սյունիքի սահմանային հինգ հատվածներում 100-300 մետր ավելի առաջ է տեղակայվել։ Նշվում էր, որ տեղակայման ընթացքում ի հայտ են եկել քարտեզների տարընթերցումներ: Որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ: