Башҡортостан Башлығы Радий Хәбиров Шишмә районындағы “Патриот” хәрби-патриотик паркында булды

12 апрелдә Башҡортостан Башлығы Радий Хәбиров Шишмә районындағы Рәсәй Геройы Максим Серафимов исемендәге “Патриот” хәрби-патриотик паркында булды. Бында биләмәне артабан үҫтереү, төбәктә парк филиалдарын булдырыу һорауҙары буйынса күсмә кәңәшмә уҙғарылды. Кәңәшмә алдынан төбәк етәксеһе төҙөлөп ятҡан ашхана корпусын ҡараны. Уны быйыл ҡулланыуға индермәкселәр. Бина 500 кеше һыйҙырышлы һәм лекция залы итеп үҙгәртеп булырлыҡ күп функциялы булырға тейеш, тине Радий Хәбиров. Парк биләмәһендә шулай уҡ физкультура-һауыҡтырыу комплексы һәм Рәсәй Мәғариф министрлығы программаһына ярашлы 100 бала йәшәрлек ике модулле корпус төҙөйәсәктәр. Радий Хәбиров төҙөлөш майҙансығын ҡараны, уҡытыусылар һәм курсанттар менән аралашты. Кәңәшмәлә Башҡортостан Башлығы бөтә төҙөлөш эштәренең сифатлы башҡарылырға тейешлеген һыҙыҡ өҫтөнә алды. ”Патриот” паркының беренсе филиалы Баймаҡ районы Күлтабан ауылында булдырыласаҡ - унда мәҙәни-белем үҙәге төҙөлә. Уны 2024 йылдың 1 сентябренә файҙаланыуға тапшырырға планлаштыралар. Күҙалланған тағы ике майҙансыҡ Ауырғазы һәм Ҡыйғы райондарында урынлашҡан. Төбәк башлығы киләсәк быуынды тәрбиәләүгә һәм уҡытыуға хәрби операцияла ҡатнашҡандарҙы йәлеп итергә кәрәклеген әйтте. - Иғтибар иткәнһегеҙҙер, бында хеҙмәт итеп ҡайтҡан шәп хәрбиҙәр бар. Улар белемле, хәрби тәжрибәләре ҙур. Был да бик мөһим, - тине ул. Фото: Башҡортостан Башлығы сайты.