Ադրբեջանական զինուժի գնդակոծության հետևանքով զոհված Հենրիկ Քոչարյանը Վայոց ձորի մարզիչ էր, Վայքից, 44-օրյա պատերազմի մասնակից էր, հայտնում է news.am-ը։ Նա 26 տարեկան էր, ծառայում էր որպես լեյտենանտ։
Ինչպես կայքին հայտնել են համայնքապետարանից, նա Ջաբրայիլի շրջանի մարտերին մասնակցելիս ուսի հատվածում մեկ անգամ վիրավորում է ստացել, ապաքինվել ու կրկին վերադարձել է մարտի դաշտ, ստացել երկրորդ վիրավորումը ոտքի հատվածում:
«Նա իր ձեռքերով մարտի դաշտից հանել է պատերազմում զոհված ընկերոջ դին»,- ասել են համայնքապետարանից։
Քոչարյանը, մինչ զինվորական դառնալը, սովորել է նաև Ֆիզիկական կուլտուրայի ինստիտուտում։ Երեխաներից ավագն էր, ունի քույր և եղբայր։
Հիշեցնենք, որ ապրիլի 11-ին՝ ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։
ՀՀ ԱԳՆ-ն Բաքվի սադրանքը Հայաստանի տարածքային ամբողջականության դեմ ոտնձգություն է որակել։ ՀՀ ՊՆ-ն տեղեկացրել է ապրիլի 11-ի փոխհրաձգության հետևանքով դիրքային կորուստներ չունենալու մասին։