ԱՄՆ Ներկայացուցիչների պալատի անդամ Ադամ Շիֆը կոչ է արել կոնգրեսականներին միանալ նախաձեռնությանը և նամակ ստորագրել առևտրի նախարար Ջինա Ռայմոնդոյին՝ պահանջելով պարզաբանել, թե ինչու է նախարարությունը դիտարկում Բաքվին ամերիկյան հրազենի մատակարարումների լիցենզավորման հնարավորությունը Ադրբեջանի կողմից Արցախի 125-օրյա շրջափակման և Արցախի վրա շարունակվող հարձակումների պայմաններում, հայտնում է Ամերիկայի Հայ դատի հանձնախումբ (ANCA):
«Բայդենի վարչակազմը, որը շարունակում է ռազմական օգնություն մատակարարել նավթով հարուստ Ադրբեջանին և դեռ չի հետաքննել Ադրբեջանի կողմից Արցախի դեմ օգտագործված թուրքական անօդաչու թռչող սարքերում ամերիկյան դետալների առկայության հարցը, այժմ դիտարկում է բռնապետական Ադրբեջանին ամերիկյան հրացանների ուղղակի վաճառքի հնարավորությունը, որի զինվորականները գնդակահարում են անզեն հայ ռազմագերիներին և այդ սպանությունների մասին տեսանյութեր տարածում սոցիալական ցանցերում>, - ասվում է ԱՄՆ առևտրի նախարարին ուղղված Շիֆի նամակում:
Կոնգրեսականն ընդգծել է, որ «Հայաստանին ուղղված մահաբեր զենքի» մատակարարումները նոր հակամարտություն կառաջացնեն: Նա հիշեցրել է, որ ԱՄՆ Պետդեպարտամենտի Մարդու իրավունքների մասին 2022 թվականի զեկույցում փաստագրված են «հավաստի տեղեկություններ Ադրբեջանում պահվող հայ զինվորների սպանությունների, այդ թվում՝ ռազմագերիների նկատմամբ խոշտանգումների և անմարդկային ու արժանապատվությունը նվաստացնող վերաբերմունքի մասին»։
ԱՄՆ Կոնգրեսի անդամները պետք է ստորագրեն առևտրի նախարարին ուղղված նամակը մինչև ապրիլի 21-ը:
Ադրբեջանին ամերիկյան հրազենի, այդ թվում՝ գրոհային և կիսաավտոմատ դիպուկահարների մոդելների հնարավոր վաճառքի մասին տեղեկատվությունը փետրվարի 1-ին հնչեցրել է Սենատի արտաքին հարաբերությունների հանձնաժողովի ղեկավար Ռոբերտ Մենենդեսը: Նա հայտարարել է իր խորը մտահոգության և այդ գործարքի «վճռական մերժման» մասին։