Հայաստանում անվտանգությունն արտահայտվում է մեկ ձևով` Նիկոլ Փաշինյանի անձնական պաշտպանությամբ, այս մասին Ֆեյսբուքի իր էջում գրել է «Պատիվ ունեմ» խմբակցության պատգամավոր Տիգրան Աբրահամյանը։ Նա հավելել է, որ այլ բան ոչ Փաշինյանին և ոչ էլ նրա իշխանությանը չեն հետաքրքրում։
Պատգամավորը հիշեցրել է՝ արդեն պաշտոնապես հաստատվել է, որ Հայաստան մտած ադրբեջանցի զինծառայողներից մեկը Կապանում խաղաղ բնակչի է սպանել։
«Ով գոնե նվազագույն չափով տիրապետում է ՀՀ քարտեզին ու գիտակցում, թե ինչ է նշանակում Սիսիանի ուղղությամբ ներթափանցելն ու այնուհետև Կապան համայնք հասնելը, բնականաբար գիտի, որ այս իշխանության պայմաններում, ՀՀ-ում տրամաբանորեն չկա մի բնակավայր, որտեղ չեն կարող մուտք գործել ադրբեջանցիները»,- գրել է Աբրահամյանը:
Տեղի ունեցածը կարող էր արձանագրվել սահմանագծի այլ ուղղությամբ, այլ մարզում, այլ համայնքում ու լրիվ այլ ելքով, հավելել է պատգամավորը։
«Դեռ պարզ չէ, թե ՀՀ տարածք մուտք գործելով ինչ նպատակներ են հետապնդել 2 ադրբեջանցիները, սակայն ակնհայտ է, որ կազմակերպված, այլ պատրաստություն անցած դիվերսիոն խմբերը կարող են խոշոր վնաս հասցնել ՀՀ-ին»,- գրել է նա:
Հիշեցնենք, որ ադրբեջանցի երկու զինվորականները, որոնք ՀՀ-ում հայտնաբերվել էին ապրիլի 11-ին և 14-ին, մեղադրվում են 2 և 3 հոդվածներով, որոնք սակայն սպանության հոդվածներ չեն պարունակում: Նրանցից մեկը որոշ տեղեկությունների համաձայն՝ ապրիլի 13-ին սպանել է ԶՊՄԿ պահնորդին՝ հասցնելով 6 հրազենային վնասվածք: Ըստ լուրերի՝ նա նույն պահնորդի հեռախոսով ուղիղ եթեր էր մտել ու հայտնել, որ հարյուրավոր հայերի է սպանել Հայաստանում:
Ապրիլի 10-ին Ադրբեջանի պաշտպանության նախարարությունը հայտնել էր Նախիջեւանում երկու ադրբեջանցի զինվորների անհետացման մասին։ Նույն օրն ավելի ուշ Հայաստանի պաշտպանության նախարարությունը հայտնել էր հանրապետության տարածքում առաջին ադրբեջանցի զինծառայողին, իսկ հետո՝ ապրիլի 13-ին, երկրորդին բերման ենթարկելու մասին։ Բացի այդ, ապրիլի 13-ին Ադրբեջանի հետ սահմանամերձ շրջանում սպանվել էր Զանգեզուրի պղնձամոլիբդենային կոմբինատի պահակը։ Լրատվամիջոցները հայտնել էին, որ մահացածի հեռախոսը հայտնաբերվել է Ադրբեջանի ԶՈւ երկրորդ զինծառայողի կալանավորման ժամանակ։ Ավելի ուշ Գլխավոր դատախազությունը Հայաստանում ձերբակալված ադրբեջանցի զինվորականներից վերջինին մեղադրանք էր առաջադրել Զանգեզուրի պղնձամոլիբդենային կոմբինատի անվտանգության աշխատակցի սպանության համար։