Տեղ համայնքն ամենապատրաստված է ՀՀ-ում, Տեղում կա զինանոց, զենքի խնդիր գոյություն չունի, գյուղի յուրաքանչյուր տղամարդ որոշակի պատերազմական իրավիճակի ժամանակ գիտի, թե ինչ անի։ Այս մասին լրագրողների հետ զրույցի ժամանակ հայտարարեց ՔՊ պատգամավոր Արմեն Խաչատրյանը։
«Երբ պաշտպանության խնդիր է լինում, գյուղը պետք է ունենա իր ռազմավարական ծրագիրը։ Տեղը շատ բարձր պատրաստվածություն ունի, և մյուս համայնքները պետք է օրինակ վերցնեն։ Տեղում կա զինանոց, զինանոցում ամեն զենքի վրա անուն-ազգանուն կա, թե այդ զենքն ումն է և ում պետք է տրամադրվի, բայց խաղաղ իրավիճակներում այդ զենքը չի տրամադրվում անիմաստ մեկին, որ կապի մեջքին, գնա խանութ»,- ասաց պատգամավորը՝ մանրամասնելով, որ գյուղացիներին զենք չի բաժանվել, բայց երբ կարիքն առաջանում է, ցանկացած գյուղացի գիտի, թե իր զենքը որտեղ է գտնվում։
Արմեն Խաչատրյանի խոսքով՝ սահմանը պաշտպանում են կամ սահմանապահ զորքը, կամ ՀՀ զինված ուժերը։ Գյուղի կամ համայնքի բնակիչը պաշտպանում է սահմանը, եթե անցնում է պայմանագրային ծառայության և մտնում է կամ սահմանապահ զորքեր, կամ ԶՈւ-ում իրականացնում է պաշտպանություն։
«Սահմանապահ գյուղում, սակայն, քաղաքացիական հասարակությունը պետք է պատրաստ լինի ցանկացած իրավիճակի։ Սա է խնդիրը։ Իրենք գիտեն, որ պահին որ հրահանգն ստանալուց ինչ գործողություններ անեն»,- ասաց պատգամավորը։
Նա հավելեց, որ անցակետեր տեղադրելու մասին ոչինչ չի լսել և նշեց, որ Տեղ գյուղից դեպի համապատասխան սահմանային գոտի, որտեղ խնդիրներ կան, գնալու համար կա ոստիկանական անցակետ՝ անվտանգությունից ելնելով և Ադրբեջանը գործ չունի, թե ոստիկանները որտեղ ինչ անցակետեր են տեղադրում։
Անդրադառնալով Ադրբեջանի նախագահ Իլհամ Ալիևի՝ վերջին օրերի կրկին սպառնալիքներով լի հայտարարություններին՝ Արմեն Խաչատրյանը նշեց, որ դժկամությամբ է մակնաբանում Ալիևի սանձարձակ խոսքերը։
«Ալիևը չէ, որ պետք է թելադրի՝ մենք ինչ անենք։ Ալիևը պետք է հասկանա, որ ուժով և բռնությամբ որևէ հարց չի կարող լուծել։ Իր բռնապետական ռեժիմի պայմաններում նման հայտարարություններն ի վնաս իրեն են լինելու։ Բոլոր բռնապետերի վերջն էլ դա է եղել»,- ասաց նա։
Մանրամասները՝ տեսանյութում։