Салауат урман хужалығында Малаяҙ урман питомнигы биләмәһендә ултыртыу материалын – ике йыллыҡ ябай ҡарағай үҫентеләрен ҡаҙыу буйынса эштәр алып барыла. Асыҡ тамыр системалы бер миллион дананан ашыу үҫенте әҙерләргә кәрәк. – Ҡаҙып алынған үҫентеләрҙе урман культуралары майҙанына сығарабыҙ һәм ҡар өйөмөнә йыябыҙ. Ағас ултыртыу эштәрен “тупраҡ өлгөрөүенә” ҡарап башлаясаҡбыҙ. Көҙгө осорҙа урман культуралары өсөн ер һөрөлдө һәм урмандарҙы тергеҙеү эштәренә тулыһынса әҙерләнде. Ағас ултыртыуҙы май байрамдарына тиклем тамамларға ниәтләйбеҙ. Барыһы ла һауа шарттарына бәйле, – тине Салауат урман хужалығы директоры Рәфит Бәҙретдинов. Ә бына “Борай урманы” автономиялы учреждениеһы хеҙмәткәрҙәре теплица хужалығында сәсеү эштәренә тотонған. Кассеталарҙа шыршы һәм ҡарағай үҫентеләре үҫтерелә. Урмансылар 2023 йылда 300 меңдән ашыу себер шыршыһы һәм 390 мең самаһы ябай ҡарағай үҫентеһен үҫтерергә ниәтләй. Әйтергә кәрәк, ябыҡ тамыр системалы үҫентеләр стандарт үлсәмдәргә асыҡ тупраҡтағына ҡарағанда байтаҡҡа тиҙерәк етә. Иң мөһиме – уларҙы дөрөҫ тәрбиәләүҙе тәьмин итеү. Иҫегеҙгә төшөрәбеҙ, Башҡортостан урмансылары урмандарҙы тергеҙеү эшен Рәсәй Президенты Владимир Путиндың май указы менән булдырылған “Экология” милли проектының “Урмандарҙы һаҡлау” федераль проектын тормошҡа ашырыу сиктәрендә алып бара. 2023 йылға 14,8 мең гектарҙан да кәм булмаған майҙанда урмандарҙы тергеҙеү эштәрен башҡарыу буйынса план билдәләнгән. #ВладимирПутин #национальныепроекты#нацпроекты #региональныепроекты#регпроекты#нацпроектыБашкортостан Фото: Урман хужалығы министрлығы.