Սահմանին սկսված փոխհրաձգության հետևանքով Սոթքի հանքավայրի աշխատանքը ժամանակավորապես դադարեցվել է, իսկ անձնակազմը՝ տարհանվել:
Այս մասին Armenia Today-ին հայտնեց «Գեոպրոմայնինգ» ընկերության ներկայացուցիչ Ռուզաննա Գրիգորյանը:
Նրա փոխանցմամբ՝ ժամը 17:15-ի սահմաններում հայ-ադրբեջանական սահմանին փոխհրաձգություն է սկսվել։
«Աշխատակիցների անվտանգությունն ապահովելու համար ընկերությունը ստիպված դադարեցրել է հանքավայրի շահագործումը և տարհանել ողջ անձնակազմին։ Հանքավայրն այս պահին չի գործում», - հայտնեց Գրիգորյանը։
Հիշեցնենք, որ այսօր՝ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Նախնական տվյալներով հայկական կողմն ունի զոհեր և վիրավորներ:
Այսօր ավելի վաղ Armenia Today-ի հետ զրույցում Տեղի բնակիչները հայտնել էին, որ կրակոցների ձայներ են լսել։
Մարտի 30-ի երեկոյան ՀՀ ԱԱԾ-ն հաղորդել էր, որ ադրբեջանական կողմը Սյունիքի սահմանային հինգ հատվածներում 100-300 մետր ավելի առաջ է տեղակայվել։ Նշվում էր, որ տեղակայման ընթացքում ի հայտ են եկել քարտեզների տարընթերցումներ: Որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ: