“Гөлнәзирә”нең сығыштарын көтөп алалар

Һәр төбәктең үҙенә генә хас йәме, тарихы, йолалары, шәхестәре бар. Ҡыйғы районының Йосоп ауылындағы “Гөлнәзирә” үҙешмәкәр фольклор коллективы республиканың төньяҡ-көнсығыш райондары башҡорттарының халыҡ йолаларын һаҡлап ҡалыу, мәҙәни үҙенсәлектәрен сағылдырыу һәм уларҙы йәш быуынға тапшырыу маҡсатында ҙур эштәр алып бара. 10 йыллап элек барлыҡҡа килгән “Гөлнәзирә” ансамбле, Салауат районының Малаяҙ ауылында үткәрелгән “Дуҫлыҡтың сәскә атыуы” республика үҙешмәкәр художество фестивалендә уңышлы ҡатнашып, үҙҙәренең “халыҡ коллективы” тигән дәрәжәһен яҡланы. Был сарала улар “халыҡ вокаль инструменталь ансамбле” исемен алды. Унда 20-гә яҡын кеше шөғөлләнә: Зилә Ғәниева, Илгизә Баһауетдинова, Раушания Шакирова, Миңдиниса Ғәниева, Фәнүзә Солтанова, Гөлбикә Шәрәфет­динова, Нәжибә Саматова, Альфред Закиров, Кәрим Байышев, Артур Әхмәҙиев, Нәсимә Йосопова, Флүрә Ямалетдинова, Айһылыу Басирова, Зәбирә Сәләхетдинова, Зилә менән Зарифйән Мәғәфүровтар. Уларҙың һәр береһенең ансамблдә үҙенә генә тәғәйенләнешле бурысы бар. Ауыл мәҙәниәт йорто методисы Зарифйән Мәғәфүров һәр сараны музыкаль яҡтан биҙәй, балалар баҡсаһы тәрбиәсеһе Илгизә Баһауетдинова менән уҡытыусы Зилә Ғәниева төрлө тамашаларға сценарийҙар яҙа. Бөйөк Еңеү, Халыҡ-ара ҡатын-ҡыҙҙар көндәре, Яңы йыл һәм башҡа кисәләрҙе ойоштороп үткәреү – “Гөлнәзирә” ансамбле иңендә. Миңдиниса Ғәниеваның оҫта итеп мандолинала уйнауы, Флүрә Ямалет­динованың тасуири шиғыр уҡыуы, Фәнүзә Солтанованың ауыл тарихы һәм яҙмышы тураһында үҙенең шиғырҙарын һөйләүе, башҡаларҙың сығышы күңелдә яҡты эҙҙәр ҡалдыра. Улар ауыл халҡына байрам кәйефе бүләк итеп кенә ҡалмай, ә үткәндәрҙе барларға, бөгөнгө хаҡында уйланырға, киләсәкте ҡайғыртырға ла өндәй кеүек. Әйткәндәй, былтыр коллектив, Дыуан районының Арый ауылы мәҙәниәт йортонда IV зона фестивалендә “Сыңрау торна” башҡорт фольклоры конкурсында ҡат­нашып, икенсе урын яуланы. Был юлы улар бесән сабыу йолаһын һәм ғөрөф-ғәҙәттәрен күрһәтте. Һабантуй, “Һаумыһығыҙ, ауылдаштар!” байрамы ла уларҙан тыш ойошторолмай. Йәйге матур көндәрҙең береһендә ауылдан сыҡҡан ҡыҙ-улдарын йыйып, оло йыйын үткәрҙеләр. Бынан тыш, “Быуаттар аша ғөрөф-ғәҙәттәр” акцияһына ла бик әүҙем ҡушылдылар, онлайн үткән “Таҡмаҡ-шоу” конкурсында ла һынатманылар. Коллектив, Ҡыйғы районы ауылдарынан тыш, күрше райондарҙа ла концерттар менән сығыш яһай. Тамашасылар уларҙы һағынып көтөп тора, саҡыра. Клубта китапханасы Алиса Мөхәмәҙиева етәкселегендә “Оҫта ҡулдар” түңәрәге эшләп килә. Кис ултырыуға йыйылған әхирәттәр ҡорама ҡорай, диван япмалары тегә, юрған эшләй, мобилизацияланған егеттәргә йылы ойоҡбаштар бәйләй. “Гөлнәзирә” коллективы өсөн милли кейемдәрҙе, сағыу күлдәктәрҙе лә үҙҙәре теккәндәр. “Ауыл мәҙәниәт йорто – халыҡ өсөн мәҙәни тормош, осрашыу һәм аралашыу урыны, ял итеү үҙәге”, – ти клуб директоры Артур Әхмәҙиев. Әйткәндәй, ул З. Исмәғилев исемендәге Өфө дәүләт сәнғәт акаде­мияһының Театр һәм кино режиссураһы факультетын тамамлаған. Һәр тамаша уның сағыу тауыш менән алып барыуында үтә. Ҡасандыр 11 йыллыҡ урта мәктәбе, балалар баҡсаһы булған ауылда бөгөн һиллек һиҙелә, ике ҡатлы ауыл мәҙәниәт йортонда ла тынлыҡ хөкөм һөрә кеүек. Шулай ҙа унда өлкән ағайҙар һәм апайҙар репетициялар үткәрә, киләһе сығышҡа яңы сценарий төҙөй, ҡул эштәре менән була. Ә сәләмәт йәшәү рәүеше яҡлы пенсионерҙар скандинав таяҡтары менән саф һауа һуларға сыға. Ауыл халҡы шулай үҙ тормошон йәмлерәк, ҡыҙыҡлыраҡ итергә ынтыла. Ғөмүмән, Йосоп ауылында республи­каның төньяҡ-көнсығыш халыҡтарына хас мәҙәни йолаларҙы һәм ҡомартҡыларҙы һаҡлау, башҡорт мәҙәниәтен үҫтереү, фольклорын тергеҙеү маҡсатында даими эш алып барыла. Ғәлиә ҒӘНИЕВА Ҡыйғы районы.