Хәҙер табиптар ваҡытынан алда тыуған сабыйҙарҙы ла “кеше итергә” өйрәнде. Бөгөн ошондай матур тарихтың береһе тураһында һөйләмәксебеҙ. Бәхетле осраҡ тураһында Ишембай ҡалаһында йәшәгән ҡатын Өфөләге республика клиник перинаталь үҙәктең социаль селтәрҙәге төркөмөндә яҙған. Ул былтыр 690 грамлыҡ һәм 30 сантиметрлыҡ ҡыҙ бала тапҡан. “Мин 27 сентябрь көнөн ҡурҡыныс төш кеүек хәтерләйем, минең һыуым китте... Ныҡ ҡурҡтым, сөнки был хәлдең эҙһеҙ генә үтмәҫен аңлай инем. 2021 йылдың 28 сентябре, бәпесем тәүлектән ашыу һыуһыҙ, башта ҡурҡыныс уйҙар, мин туҡтауһыҙ илайым. Һуңынан ашығыс операция яһап, 25-се аҙнала минең 690 грамлыҡ һәм 30 сантиметрлыҡ “дюймовочка”м тыуҙы. Беҙҙе шунда уҡ айырҙылар, ҡыҙымды – реанимацияға, мине палатаға алып киттеләр. Әҙерәк ваҡыт үткәс, мине ҡыҙым ятҡан реанимацияға оҙаттылар”, – тип яҙған ул. Ҡатын әйтеүенсә, сабый усҡа һыймалы бәләкәй булған, көпшәләргә сырмалып ятҡан. Улар аша балаға дарыуҙар һәм аҙыҡ биргәндәр. “Дауаханала реанимацияла ятҡан баламды суҡындырырға рөхсәт иттеләр. Һәр өс сәғәт һайын янына барып, һөт килтерҙем, ашаттым, уның менән һөйләштем. Ваҡыты менән уның өсөн ныҡ хәүефләнеп киткән саҡтар булды, тик ҡыҙым бар ауырлыҡтарҙы ла еңде. Янында һәр ваҡыт табиптар һәм шәфҡәт туташтары булды, улар беҙгә һәр ваҡыт ярҙам итте”, – ти ул. Ҡыҙыҡай реанимацияла ике ай була, аҙаҡ уны яңы тыуғандар патологияһы бүлексәһенә күсерәләр, унда ул кислород аҫтында ята. “Ҡыҙым үҙаллы тын ала алмай ине. Был бүлексәлә тағы бер ай яттыҡ. 28 декабрҙә, Яңы йыл алдынан беҙҙе өйгә ҡайтарҙылар. Шундай ҙур шатлыҡ ине. Ниһайәт, үҙемдең улдарым янына ҡайтып киттек. Әле ҡыҙыма бер йәш тә алты ай. Ул бик әүҙем һәм ҡыҙыҡһыныусан булып үҫә. Ҡурҡыныс сирҙәр беҙҙе урап үтте, балам йәшенә ярашлы үҫешә. Уның ғүмере өсөн көрәшкән табиптарға рәхмәт әйтеп бөтә алмайым. Асҡар Наил улы Йәнекәев, Әлфиә Хәлил ҡыҙы Аҡҡужина, Екатерина Викторовна Некрасова, Лилиә Владимировна Бәҙретдинова, Римма Инсаф ҡыҙы Ямалетдинова кеүек табиптарға ҙур рәхмәтемде белдерәм. Минең принцессама тәүлек әйләнәһенә ярҙам иткән барлыҡ шәфҡәт туташтарына ла рәхмәт. Бар ғаиләмдән ҙур рәхмәт һеҙгә”. Күренеүенсә, табипарыбыҙ тағы бер мөғжизә тыуҙырған! Уларға иҫән-һау үҙ эштәрен башҡарыуын теләйбеҙ! Фото: "Бәйләнештә".