Рухлы улдар һәм ҡыҙҙар улар!

Иҫәнғол ауылындағы 30 йыллыҡ тарихы булған Мәрйәм Бураҡаева исемендәге гимназия-интернатының тарих битенә яңы ваҡиға өҫтәлде – 2022/2023 уҡыу йылында бында Шайморатов класы асылды. Генерал-майор Миңлеғәле Шайморатов исемен йөрөткән класҡа бөтәһе 14 уҡыусы алынған: биш ҡыҙ һәм туғыҙ малай. Тәүге көндән үк уларға айырым уҡыу кабинеты бирелгән. Ул Миңлеғәле Шайморатов, легендар 112-се Башҡорт кавалерия дивизияһы тураһындағы мәғлүмәттәрҙән торған стендтар менән биҙәлгән. Гимназия-интернат директоры Эльвира Садиҡованың хәстәрлеге, район хакимиәте башлығы Дәмин Юланов­тың ярҙамы менән уҡыусыларға махсус костюмдар тектерелгән. Класс етәк­селеге Башҡортостандың атҡаҙанған уҡытыусыһы Гөлбаныу Исмәғилеваға, хәрби кураторлыҡ Анзур Сырлыбаевҡа тапшырылһа, тәрбиәселәре – Альбина Ураҙаева. Мәрйәм Бураҡаева исемендәге гимназияла Шайморатов кластарына ҡу­йылған талаптарға яуап бирерлек класс барлыҡҡа килгән. Улар һәр яҡлап та өлгө булырлыҡ: бөтәһе лә яҡшы уҡый, спорт менән шөғөлләнә, йырлай, бейей. Шахмат, саңғы, йөҙөү буйынса ярыш­тарҙа, төрлө конференцияларҙа, кон­курс­тарҙа ҡатнашалар. Уңыштар тос. Мәҫәлән, районда үткәрелгән шахмат бу­йынса ярыштарҙа Темур Самородин бер кемгә лә алдынғылыҡты биргәне юҡ. Йөҙөү буйынса Ғәйсәр Ишмөхә­мәтов, саңғы уҙышында Дарислам Аҙнабаев, Динис Ғафаров призлы урындар яулаған. Уҡыусыларҙың республика буйынса үткән фәнни-ғәмәли конференцияларында Дарислам Аҙнабаев, Салауат Аҡъюлов яҡшы һөҙөмтә күрһәткән. Әсәйҙәре тураһында матур шиғырҙар яҙып, ижади эштәр конкурсында Илшат Сабиров менән Асҡар Юланов район кимәлендә призлы урындар алған. Районда үткәрелгән “Көлһы­лыуҙа ҡунаҡта” йыр конкурсында ла шайморатовсылар еңеүсе булған. Уҡыу буйынса ла шатландыралар: Гүзәл Исмәғилева тик “бишле” билдәләренә өлгәшһә, ҡалғандар ҙа һынатмай. Генерал-майор М. Шайморатов исемен йөрөткән кластың командиры ла геройҙың исеменә тап төшөрөрлөк түгел. Дарислам Аҙнабаев “Сулпылар” телевизион балалар тапшырыуы аша күптәргә таныштыр. Өфө ҡалаһында командирҙар ярышында иң юғары балл йыйып, ул үҙенең класына республикала үткән “Ҡышҡы Шайморатов уйында­ры”нда ҡатнашыу хоҡуғын яулаған. Класташтары ла һынатмаған, Күмертау ҡалаһындағы ярышта үҙҙәренең етеҙ ҙә, көслө лә, таһыллы ла, аҡыллы ла, йырсы ла булыуҙарын тағы бер тапҡыр раҫлап, 2-се урын алған. Класс етәксеһе Гөлбаныу Исмәғилева балаларҙың Шайморатов исемен йөрөткән класта уҡыуҙың ни тиклем яуаплы икәнлеген аңлауҙары тураһында белдерҙе: – 1 сентябрҙә уҡыусыларҙы ҡабул итеп алғанда бер аҙ хафаландым. Класҡа бирелгән шундай юғары исемде аҡларҙармы, шайморатовсы булыуҙың маҡсаттарын аңларҙармы, тип уйланым. Бөгөн, һис икеләнмәйенсә, шуны әйтә алам: уҡыусыларҙы Шайморатов класы өсөн махсус әҙерләгәндәрме ни! Бөтәһе лә иңдәренә һалынған ҙур яуаплылыҡты үтә лә яҡшы аңланы, хатта бер башҡа үҫеп киткәндәй булдылар. Тәүге көндәрҙән үк коллективта берҙәмлек, дуҫлыҡ булдырырға тырыштыҡ. Әлбиттә, иң беренсе шул кәрәк ине, сөнки класҡа башҡа ауылдарҙан да балалар килде. “Берҙәмлектә – көс” икәнен белгән уҡыусылар менән эшләүе еңел. Бына ошо берҙәмлек ҙур еңеүҙәргә алып килде, уҡыуҙа яҡшы һөҙөмтә күрһәтеүгә бу­лышлыҡ итте. Егеттәрҙең, уларҙы хат­та “малайҙар” тип әйтке лә килмәй, ҡыҙҙарға ҡарағанда күберәк булыуы яҡ­шы. Сөнки тап Шайморатов класында яуаплылыҡ көслө зат иңенә төшөргә тейештер тип уйлайым. Улар илебеҙҙең, еребеҙҙең һаҡсылары буласаҡ бит, – тине ул. Илһөйәр, телһөйәр, белемле, тәртип­ле шайморатовсыларҙың һәр береһенә ҙур өмөт бағлана. Уларҙың тыуған ерҙәренә файҙалы шәхестәр булып үҫеренә лә шик юҡ. Резеда ШӘҢГӘРӘЕВА Ейәнсура районы.