Հունաստանն ու Հնդկաստանն ապրիլի 18-28-ը Միջերկրական ծովի երկնքում լայնածավալ ռազմաօդային ուժերի համատեղ զորավարժություններ կանցկացնեն։ Այս մասին տեղեկացնում է Greek City Times-ը։
Նշվում է, որ զորավարժություններին կմասնակցեն Հնդկաստանի Սու-30 ինքնաթիռներ, Հունաստանից՝ F-16 և Rafale ինքնաթիռներ։ Ինքնաթիռները պայմանական աջակցություն կցուցաբերեն ցամաքային և ծովային ուժերին, որոնք նույնպես կներգրավվեն զորավարժություններին։
Զորավարժությունները կանցկացվեն Հունաստանի ռազմաօդային ուժերի և պաշտպանության նախարարության հունական օդային մարտավարական կենտրոնի ղեկավարությամբ։ Հիմնական նպատակը համատեղ գործառնական կարողությունների բարելավումն է։
«Հնդկաստանը և Հունաստանը շարունակում են զարգացնել իրենց պաշտպանական համագործակցությունը։ Հնդկաստանի ռազմաօդային ուժերը զորավարժություններին մասնակցելու համար կուղարկեն 5 Sukhoi-30MKI կործանիչներ»,- հայտնում է աղբյուրը։