Борай районында 443 бәләкәй эшҡыуарлыҡ берәмеге иҫәпләнә, был үткән йылдағынан бер ни тиклем күберәк. Өҫтәүенә профессиональ килемгә һалым түләгән 564 үҙмәшғүл теркәлгән. Эшҡыуарҙарҙың 20,4 проценты ауыл хужалығы һәм балыҡсылыҡ, 19,8 проценты – көнкүреш хеҙмәттәре күрһәтеү, 43,8 проценты сауҙа өлкәһендә үҙ урынын тапҡан. Үҙмәшғүлдәрҙең күпселеге көнкүреш хеҙмәте күрһәтә. Ике автосервис, запас частар һатыу магазины хужаһы Айҙар Ғарипов райондың ырамлы эшләгән, йәмәғәт тормошонда әүҙем ҡатнашҡан эшҡыуарҙары рәтендә. Яңыраҡ ул магазины янында ҡатыны Анжелика менән “Үҙең менән ҡәһүә ал!” тип аталған кафе асып ебәргән. Берәүҙәр автомобиленә запас частар һайлағанда, икенселәр кәйефен ҡәһүә менән күтәрә. Эшҡыуарҙың өҙлөкһөҙ ир-ат ҡайнашҡан запас частар менән һатыу иткән магазинында осрашып, пландары, хәрби яҡташтары менән нисек бәйләнеш тотоуы, уларға ярҙам күрһәтеүе менән ҡыҙыҡһындыҡ. – Класташ дуҫым Марат менән әмәле сыҡҡан һайын хәбәрләшеп торабыҙ. Алғы һыҙыҡтағы егеттәр зарланырға яратмай, әммә ҡаршы көстәр менән көрәшеү өсөн бик мөһим әйберҙәр кәрәклеген йәшермәйҙәр. Бер көн ауылдашым, “семерка” табып ебәр әле, класташ, тип һораны. Был мәсьәләне тиҙ хәл иттек. Аҙаҡ ул егеттәргә автомунса кәрәклеген белдерҙе. Шулай итеп, был үтенесте лә йәһәт үтәй алдыҡ. Улдары, ирҙәре хәрби хеҙмәттәге ғаиләләргә аҡсалата ярҙам итәбеҙ. “Борай урманы” ойошмаһы ла ситтә ҡалмай, – ти Айҙар Рәзиф улы. – Фермерҙарҙың әүҙемлегенә, һәр саҡ ярҙамға әҙер булыуына һоҡланмау мөмкин түгел, ошондай ауыр саҡта кемдең кемлеге һынала ла инде. Егеттәребеҙ Ҡазанда хәрби әҙерлектә ятҡанда байтаҡ гуманитар ярҙам күрһәтергә тура килде. Кемгәлер был хаҡта әйтмәгәнбеҙ, онотҡанбыҙҙыр, күрәһең. “Ниңә беҙгә өндәшмәнегеҙ, ниңә ситтә ҡалдырҙығыҙ, беҙҙең дә ҡулдан килгән ярҙамды күрһәтке килә”, – тип үпкә белдергәндәр ҙә булды. Күңелдәре көр, тауыштары ышаныслы яңғыраған, зарланырға ғәҙәтләнмәгән хәрби егеттәребеҙ алдында беҙ ҙә һыр бирмәйбеҙ, һөйләшкәндә кәйефтәрен төшөрмәҫкә, булышлыҡ итергә әҙер тороуыбыҙҙы белдерергә тырышабыҙ. Улар бөгөн барыбыҙҙың именлеге, тыныс йоҡоһо, матур тормоштоң ҡәҙерен белеп йәшәүе өсөн алғы һыҙыҡта. Берҙәм булһаҡ, беҙҙең рухты бер көс тә бөгә һәм һындыра алмаҫ. Динә АРЫҪЛАНОВА