Көсөгөҙҙө һынап ҡарағыҙ!

11 апрелдә Башҡортостан Башлығының гранттар фонды 2023 йылда дәүләт телдәрен һәм республика халыҡтары телдәрен һаҡлау һәм үҫтереү өсөн Башҡортостан Республикаһы Башлығы гранттары конкурсында ҡатнашыуға ғаризалар ҡабул итә башланы. Конкурс мәҙәниәт, мәғариф, фән, киң мәғлүмәт саралары, йәштәр сәйәсәте һәм спорт өлкәләрендә Башҡортостан Республикаһының дәүләт телдәрен һәм төбәктә йәшәгән халыҡтарҙың телдәрен һаҡлауға һәм үҫтереүгә йүнәлтелгән, шуға күрә унда республика биләмәһендә теркәлгән коммерцияға ҡарамаған ойошмалар, шулай уҡ, әгәр уларҙың проекттары Башҡортостандан ситтә башҡорт телен һаҡлауға һәм үҫтереүгә йүнәлтелгән булһа, Рәсәйҙең башҡа төбәктәренән коммерцияға ҡарамаған ойошмалар ҡатнаша ала. Бер проектты финанслау өс миллион һумдан артмаҫҡа тейеш. Конкурсҡа ғаризалар 2023 йылдың 10 майына тиклем урындағы ваҡыт менән 17.00 сәғәткәсә ҡабул ителә. Былтыр был йүнәлеш буйынса 28 проект еңеүсе булған. Уларҙың 8-е Рәсәйҙең башҡа төбәктәрендә тормошҡа ашырыла һәм башҡорт телен, башҡорт халҡының тарихын һәм фольклорын өйрәнеүгә йүнәлтелгән. Улар араһында Свердловск, Силәбе өлкәләре, Ханты-Манси автономиялы округы, Пермь крайынан проекттар бар. Башҡа еңеүсе проекттар Башҡортостан Республикаһының башҡа халыҡтары телдәрен һәм мәҙәниәтен яҡлауға йүнәлтелгән. Конкурсҡа ғариза бирергә, шулай уҡ конкурста ҡатнашыусыларға талаптар, гранттар биреү шарттары һәм тәртибе хаҡында тулыраҡ мәғлүмәт менән грантыглавы102. рф сайтында танышырға мөмкин. Конкурсҡа ғариза әҙерләү өсөн Башҡортостан Республикаһы Башлығы гранттары фондының рәсми төркөмөндә белем биреү видеоһы менән түбәндәге һылтанма буйынса танышырға кәңәш бирәбеҙ: https://vk.com/video/playlist/-191923773_4.