“Татар кызчыгы, татар малае” бәйгесе зур бәйрәмгә әверелде

Башкортстан Республикасындагы “Ак калфак” татар хатын-кызлары иҗтимагый оешмасы тарафыннан бәйгегә старт февраль аенда ук бирелеп, тәүдә чиратта ул республика буйлап балалар бакчаларында үткәрелде. Финалга исә Кушнаренко районының “Елмаю”, Дүртөйледән “Кояшкай”, Чишмә районының “Салават күпере”, Уфа районының115нче балалар бакчаларында тәрбияләнүчеләр чыгып, үзләренең туган телләрен яхшы белүен һәм иҗади сәләтләрен күрсәттеләр. Әйе, әлегә кечкенә булуларына карамастан, балаларның әзерлегенә, осталыгына өлкәннәр хәйран калып, сокланып утырды. Кунакларны чишмәлеләр күркәм тамаша белән каршы алды. Бер вакытка барысы да үзен әкият дөньясына килеп эләккәндәй хис иткәндер. Монда Шүрәлесе дә, Су анасы да бар. Район Мәдәният сарае артистлары Рәүф Нәрыкбаев һәм Айгизә Әхмәтшина үз рольләрен бик оста башкардылар һәм балалар белән төрле уеннар уйнап, биремнәр үтәп, аларны сәхнәдә чыгыш ясарга әзерләделәр, үзләрен кыю һәм иркен тотарга булышлык иттеләр. Бәйгедә катнашучылар, тәү чиратта, үзләре белән таныштырып үтте, гаиләсе, мавыгулары турында сөйләде. Моңа әзерлек чикләрендә балалар үзләренең шәҗәрәләрен дә өйрәнгән.Иҗади бәйгегә кызлар һәм малайлар үзләренең тәрбиячеләре ярдәме белән ныклы әзерләнгән. Җырладылар да, биеделәр дә, оста итеп шигырьләр дә сөйләделәр. Милли ризыкларны исә әниләре һәм нәнәйләре белән бергә әзерләгәннәр. Өчпочмак, чәк-чәк, кыстыбый, киселгән токмач – бу гаиләләрдә тансык ризык түгел. Өлкәннәр белән бергә әзерләгәч, алар барлык нечкәлекләрен белеп тора һәм әзерләү рецептлары белән дә ураклаштылар.Дүртенче конкурста балалар үзләренең тизлеген һәм җитезлеген күрсәтте. Ә инде бишенче бәйге – үзе бер тамаша булды. Конкурсатлар татар халкының күркәм йолаларын тәкъдим итте. Дүртөйлеләр һәм Ярмилеләр сабантуйдагы бихисап йолаларны, борын-борыннан килгән һәм әлеге көнгәчә халык яратып уйналган уеннарны күрсәттеләр: ат чабышы, аркан тартыш, чиләкләр белән су ташу, кашыкка йомырка салып йөгерү, капчык киеп сикерү булсынмы – балалар барысын да яхшы белә. Ә иң мөһиме, алар искиткеч оста итеп сәхнәләштерелгән.Уфа районының 115нче балалар бакчасы тәрбияләнүчеләре күрсәткән Кош утырту йоласы да бик үзенчәлекле булды.Ә Кушнаренко районында “Аулак өй”ләр әле дә үткәрелә, күрәсең. Балалар кул эшләрен дә белә, борынгы уеннарны да рәхәтләнеп уйный.Чынлап та, “Татар кызчыгы, татар малае” зур бәйрәмгә әверелде. Танылган җырчы, Башкортстанның атказанган артисты Радик Диниәхмәтовның катнашуы чарага тагын да ямь өстәде. Халык яратып кабул иткән җырларын башкарудан тыш, балалар белән дә ихлас аралашты.Бәйгеләр арасында “Йолдызлы юл” бию студиясе җитәкчесе Лилия Мөхәммәдиева флеш-моб үткәреп, өлкәннәрнең дә, тамаша кылырга килгән балаларның да кәефләрен күтәрде.Ниһаять, дулкынландыргыч мизгел - бәйгегә йомгак ясар вакыт җитте. Мәртәбәле жюри: “Ак калфак” җитәкчесе Люция Вафина, радиожурналист, социаль педагог Венера Идрисова, хореограф Лилия Мөхәммәдиева, “Ак калфак” ның Благовар районы һәм Авдон бүлекчәләре җитәкчесе Альбина Якупова бик дөрес карар кабул итте. Барлык катнашучылар һәм аларның ярдәмчеләренә “Ак калфак” татар хатын-кызлары иҗтимагый оешмасының дипломнары һәм бүләкләре тапшырылды. Шулай ук малайлар һәм кызлар төрле номинацияләрдә дә билгеләнде.Аиша Шәрипова – иң талантлы кыз, булса, малайлар арасында бу титулга Азамат Мәхмүтов ия булды. “Сәхнә чаткысы” номинациясендә Аиша Фәттахова һәм Тимур Шәмсетдинов билгеләнделәр. Иң тырыш малай – Айдар Байков һәм иң тырыш кыз – Әминә Әхмәтова. Бәйгенең абсолют җиңүчеләре - “Татар кызы” тасмасы белән Дүртөйле кызчыгы Җәннәт Бимәтова бүләкләнде, ә “Татар малае” титулына Уфа районының 115нче балалар бакчасы тәрбияләнүчесе Ранель Фатыйхов лаек булды.Балалары белән килгән әти-әниләр чара дәвамында сабыйлары белән горурланып, аларның уңышларына сөенеп утырды һәм тәрбиячеләргә балаларының сәләтләрен ачуда һәм үстерүдә ярдәм иткәннәре, оештыручыларга шундый чаралар үткәреп, сәләтләрен күрсәтергә мөмкинлек биргәннәре өчен чиксез рәхмәтләрен җиткерде.“Татар кызчыгы, татар малае” балалар бакчалары тәрбияләнүчеләре арасында беренче тапкыр үткәрелүгә карамастан, бик күркәм килеп чыкты һәм киләчәктә йолага әверелер, дип ышанасы килә. Чөнки әлеге чараның әһәмияте бәһалап бетергесез: урыслашып барган күпме татар гаиләләрендә әлеге бәйгегә әзерлек чикләрендә генә әти-әниләр дә, балалар да татар телен ныклап өйрәнде, халкыбызның гореф-гадәтләре, йолалары белән танышты, аларда милләтебез белән горурлану хисләре уятты, бу юнәлештә тагын да активрак эшләргә рухландырды. Шул ук вакытта балаларга сәләтләрен күрсәтү мөмкинлеге бирде, яңадан-яңа уңышларга ирешү өчен зур адым булды.Гомумән, халкыбызның теле, гореф-гадәтләре онытылмасын дисәң, аларны бездән соң киләчәк буынга тапшырырга кирәк. “Татар кызчыгы, татар малае” бәйгесе шуны күз уңында тотып оештырылды да инде. Иң мөһиме, ул дәвамлы һәм озын гомерле булсын иде.Автор фотолары.