Башҡортостандың үҙ мотоуҡсылар полкы барлыҡҡа килеүе ихтимал

Башҡортостан Башлығы Радий Хәбиров бөгөнгө Хөкүмәттең аҙналыҡ кәңәшмәһендә Башҡортостандың үҙ мотоуҡсылар полкы барлыҡҡа килеү ихтималлығы тураһында хәбәр итте. 2023 йыл башында хәрби хәрәкәттәр ветерандары махсус хәрби операцияны үтәүсе хәрби хеҙмәткәрҙәргә ярҙамға подразделениелар булдырыу башланғысы менән сығыш яһаны. Отставкалағы полковник Борис Гордеев һәм хәрби хәрәкәттәр ветераны Илдар Зәйнетдин – Даян Мурзин исемендәге һәм “Төньяҡ амурҙары” батальондарына, ә махсус хәрби операцияла ҡатнашыусы Илгиз Солтанморатов “Ватан” отрядына ҡабул ителеү тураһында иғлан итте. Уларға яңы бүлексәләр сафына инергә теләп күп кеше мөрәжәғәт иткән. Күптәре армияла хеҙмәт иткән, хәрби тәжрибәгә эйә. Оператив кәңәшмәлә Башҡортостан Башлығы ошо башланғыстарҙы хуплауы тураһында белдерҙе һәм Башҡортостан батальондарын ҙур бер бүлеккә – исемле мотоуҡсылар полкына берләштерергә тәҡдим итте. – Беҙ был башланғысты хуплайбыҙ һәм уны булдырыу менән бәйле сығымдарҙы үҙ өҫтөбөҙгә алабыҙ. Беҙҙең яҡтан тулы ярҙам буласаҡ. Полктың етәксе составы буйынса кандидатуралар тәҡдим итеүегеҙҙе һорайым, Оборона министрлығы менән был мәсьәләлә республика фекере иҫәпкә алынасаҡ, тип килештек. Хәрби комиссариат, Һаулыҡ һаҡлау министрлығы һәм Хөкүмәттең берлектә эшләүе талап ителә. Аҙна һайын был мәсьәләне контролдә тотасаҡбыҙ, – тине Радий Хәбиров. Фото: Башҡортостан Башлығы сайты.