Бөгөн ил өсөн бик мөһим ваҡиға – махсус хәрби операция барған төбәктән ҡыҫҡа ваҡытлы ялға ҡайтҡан егеттәр араһында яҡташыбыҙ Вәсил Ҡорбанов та бар. Уның менән осрашыу яҡташыбыҙҙың холоҡ-фиғелендәге бығаса күҙгә салынмаған күркәм сифаттарҙы нығыраҡ асты. Борай районының Иҫке Ҡарағош ауылында тыуып үҫкән Вәсилде оҫта ҡуллы, тырыш егет тип белә инек. Ғаиләлә үҫкән дүрт малайҙың икенсеһе ул. Мәктәптә 9-сы класты тамамлағас, Нефтекамаға, машина төҙөлөшө колледжына уҡырға йүнәлә. Маҡсаты – яңы технологияларҙы үҙләштереү, программист булыу. Уҡыу йортон уңышлы тамамлау менән хәрби хеҙмәткә алына. Булдыҡлы егет унда ла һынатмай, ефрейтор званиеһында тыуған яғына әйләнеп ҡайта. “Башнефтегеофизика” ойошмаһына эшкә урынлаша. Эшендә ҙур тәжрибә туплап, һөнәре буйынса “Иң яҡшы геофизик” исеменә лә лайыҡ була. Тормош иптәше Динара менән ике ул үҫтерәләр. Эҙләнеүсән, эшһөйәр ғаилә башлығының ҡулынан бөтә эш килә, ниндәй материал ҡулына эләкһә лә, унан ҡойоп ҡуйғандай йыһаздар, әйберҙәр тыуа. Иң беренсе беләҙеген хәләл ефете Динараға бүләк итә, шунан башлап ул төрлө биҙәүестәр эшләүгә илһамланып тотона… Өлөшләтә хәрби мобилизация башланғас, Вәсил хеҙмәткә саҡырыла. Ҡазан янындағы полигондарҙа хәрби күнекмәләр үткәс, иптәштәре менән Донбассҡа оҙатыла. Егет тыуған республика менән бәйләнештең ныҡ булыуын, яҡташтарҙың ярҙам итеүен билдәләп, етәкселәргә һәм ауылдаштарға ихлас рәхмәтен белдерҙе. – Беҙҙе бөтә кәрәк-яраҡ менән Рәсәй Ҡораллы Көстәре тәьмин итһә лә, тыуған яҡтан килгән һәр хәбәр, ризыҡ беҙҙең өсөн бик ҡәҙерле. Йылы мөнәсәбәтте һәм иғтибарҙы тойоу беҙҙе көслөрәк, ҡыйыуыраҡ итә, - ти ул. – Гуманитар ярҙам килеүен ишетһәм, “балаларҙан хаттар юҡмы?” тип һорайым. Бында тыуған яҡтарҙан ҡош телендәй генә булһа ла һөйөнөслө хәбәр алыу күңелде күтәреп ебәрә. Был тулҡынландырғыс хис-тойғоларҙы аңлатыуы ла ауыр. Уҡыусылар ҡулы менән яҙылған хаттарҙы ҡат-ҡат уҡыйым, ырғытмайым, ә күкрәк кеҫәһенә һалып ҡуям, улар минең өсөн яуыз көстәрҙән һаҡлаусы амулет кеүек. Кәшкәләү мәктәбенән килгән посылка минең өсөн әйтеп бөтөргөһөҙ шатлыҡ булды. Яҡташтарымдың мине онотмауына, хәтерҙә тотоуына балалай һөйөндөм. Егеттәребеҙгә хаттар яҙығыҙ, улар хәрби яланда бик ҡәҙерле, тыуған яҡтарҙан ышаныс һәм көс биреүсе хаттар яуып торһон ине! –Борайҙар ниндәй ярҙам күрһәтте?- тигән һорауымдан Вәсил шатланып, йәнләнеп китте. –Райондан ебәрелгән автомунса барыбыҙ өсөн һәйбәт бүләк булды. Мин дә ялға ҡайтыр алдынан мунса инеп сыҡтым. Шәп эшләгән егеттәр. Беҙҙе хәстәрләгән оҫталарға, тепловизор ебәргән бөтә райондаштарыма хәрбиҙәр исеменән ҙур рәхмәт! – тине егет. Ҡорбановтар ғаиләһен, ниндәй генә байрам булмаһын, эш урынынан килеп, ярҙам итеп, балаларына күстәнәсен ебәреп торалар. “Геофизиктар – берҙәм халыҡ, ай һайын посылка һалалар, хатта тепловизор алырға 100 мең һум аҡса бирҙеләр”, ти Вәсил. Хәләл ефете Динара тәү ҡарауға йомшаҡ холоҡло, баҙнатһыҙ тойолһа ла, сабырлығы, үткерлеге һәм ярҙамсыллығы менән таң ҡалдыра. Гуманитар ярҙамды хәрбиҙәргә илтеүҙә беренселәрҙән булып йөрөй. – Ике бала менән ҡалһам да, яңғыҙлыҡты тоймайбыҙ, бер үтенесебеҙҙе лә иғтибарһыҙ ҡалдырмай етәкселәр. Район хакимиәте утын менән тәьмин итте, Баҡалы ауылы фермеры Фидаил Сахаев ашлыҡ менән, ә Кәшкәләү ауыл биләмәһе башлығы Дамир Әхмәтов мунсаға электр сымы һуҙыуҙа ярҙам итте. Гуманитар ярҙам менән юлға сыҡҡас, алдан һөйләшеп, ваҡытын билдәләп, райондан алып барған бөтә посылканы Борай егеттәренең ҡулына тапшырып ҡайтам. Автомунсаны ла шулай итеп тапшырҙыҡ, – тип һөйләне Динара Динарик ҡыҙы. – Иремде ата-әсәһе ғаиләлә хеҙмәтте һәм бер-береһен яратырға өйрәтеп үҫтергән, шуға күрә унда кешеләргә ярҙам итеү, туғандар менән аралашыу хистәре бик көслө. Иремдең бер туған ағаһы ла үҙ теләге менән хәрби операцияла ҡатнаша. Илебеҙ һағына беренселәрҙән булып баҫҡан ир-егеттәребеҙ өсөн бик ғорурланабыҙ, – ти яугирҙең тормош иптәше. “Вәсил бик хәстәрлекле, балаларын яратҡан атай. Ул эшһеҙ һис ултыра белмәне, уға һәр ваҡыт нимәнелер төҙәтергә йәки яһарға кәрәк. Малайҙар араһында үҫһә лә, уның таҙалыҡты, бөхтәлекте яратыуы билдәле”, тип хәтерләй ауылдаштары. Егеттең оҫта ҡулдары менән ижад ителгән биҙәүестәр, шкатулкалар Ҡорбановтарҙың өйҙәрен йәмләй. Ҡатыны уның ҡул эштәрен күҙ ҡараһындай һаҡлап тота. Матур итеп үрелгән алҡа, муйынсаҡ һәм беләҙектәр күҙҙең яуын алырлыҡ. Ҡыйыу егеттәребеҙҙең иҫән-һау еңеү менән ҡайтып, барыбыҙҙы һөйөндөрөүен теләйбеҙ. Ә киләсәктә остаздың яңы ҡул эштәрен район күләмендә уҙғарылған күргәҙмәләрҙә күреп, барыбыҙға һоҡланырға яҙһын!. Гөлназ ХУЖИНА. Борай районы. Автор фотоһы.