8-9 апрелдә Өфөлә Конгресс-Холда “Заманса ата-әсәлек” тигән халыҡ-ара ата-әсәләр форумы үтте.Унда балаларҙы тәрбиәләү, уларҙың һәләттәрен үҫтереү буйынса көнүҙәк мәсьәләләр ҡаралды. Программа сиктәрендә 8 апрелдә “Ата-әсәләрҙе уҡытыу көнө” үтте. Унда “Заман балаһын тәрбиәләү тренды.Ниндәй ҡиммәттәр тәрбиәләү, ниндәй оҫталыҡтарға өйрәтеү”, “Бала тәрбиәләү: һөйөү нисек мейене формалаштыра”, “Әгәр бала бер нимә лә теләмәһә” һәм башҡа темалар күтәрелде. Шулай уҡ “Тиҙ уҡыу”, Каллиграфия”, “Китап клубы”, “Менталь арифметика” темалары буйынса оҫталыҡ дәрестәре ойошторолдо. Бөгөн, 9 апрелдә иһә, “Берлектәге йәкшәмбе” уҙғарылды, был ата-әсәләр һәм балалар өсөн файҙалы эштәр көнө. -Бөгөн беҙҙең алда мөһим бурыс тора – дәүләт власы органдарын, йәмәғәт ойошмаларын, ата-әсәләр берләшмәһен берләштереү һәм барлыҡ көстө үҫеп килгән быуынды тәрбиәләүгә йүнәлтеү. Форум сиктәрендә ике көн дауамында дискуссия майҙансыҡтары, психологтар, педагогтар лекциялары эшләне, белгестәр консультациялары ойошторолдо. Улар мәғлүмәт һәм методик ярҙам күрһәтте , -тине Башҡортостандың мәғариф һәм фән министры урынбаҫары Инесса Косолапова. – Йәкшәмбе – ул ғаилә көнө. Һәм шуға бөгөн балаларға уларҙың һәләттәрен үҫтереү өсөн оҫталыҡ дәрестәре уҙғарылды. Форумдың ҡунаҡтары һәм ҡатнашыусылары тәрбиәләүгә, уҡытыуға ҡағылышлы ҡыҙыҡһындырған һорауҙарын бирҙе. Силәбе ҡалаһынан психолог, ғаилә терапевы Наталья Дюкова, үҫмерлек осороноң мәңгелек түгеллеген, тиҙ үтеүен белдерҙе. Был осорҙа ата-әсәләргә тыныслыҡ һаҡларға һәм биш ҡағиҙәне үтәргә саҡырҙы: түҙемлек, ихлас ҡыҙыҡһыныу, яуаптар өсөн иркенлек биреү, тәнҡитте кәметеү, ярҙам итеү. -Ата-әсәгә беренсе булып үҫмер менән аралашыу мөһим. Был абруйҙы юғалтыуҙы аңлатмай, киреһенсә, үҙ-ара ышаныслы мөнәсәбәтте һаҡларға ярҙам итә,–тине ул. Халыҡ-ара ата-әсәләр форумында 100 эксперт, ике меңдән ашыу ата-әсә һәм биш меңдән ашыу кеше онлайн форматта ҡатнашты. Фото:Илья Наумов.